Grupo di Heavy Equipment den protesta relaciona cu ROP

Na prome lugar nos kier a gradici tur envolvi den e mundo di Heavy Equipment grandi y chikito, Minanan, henter nan manpower pa a uni hunto y sostene nos. Nos a para firme y a demostra nos malcontento y preocupacionnan contra un maneho inhusto di Gobierno di Aruba, particularmente e minister Otmar Oduber.

Nos a aprecia cu Min. Andin Bikker y Min. Otmar Oduber a ricibi nos manifiesto di dialuna mainta 11 di Maart 2019, aunke e tabata bao presion. Nos como grupo di Heavy Equipment & Minanan a demostra nos curashi & lucha pa nos pueblo y nos compania y nos trahadornan y nan famia.

Durante e reunion cu nos a logra hanja dialuna mainta, despues di a entrega nos manifiesto, nos a ripara cu Min. Otmar Oduber tin hopi conocemento di ROP, na unda e Minister a duna nos algun consehonan cu nos por sigi.

E ROP ta yen di asuntonan cu no ta duidelijk ni pa nos como companianan local ni pa e pueblo tampoco!! Un gobierno mester ta transparente y Pueblo tin e derecho di haya tur informacion CORECTO di e ROP. Pueblo merece di tin mas claridad riba e ley di ROP.

Durante Townhall-meeting di Camara di Comercio tokante ROP diamars 12 di Maart 2019 opinionnan y criticanan di diferente comerciantenan y tambe personanan cu terenonan propiedad (“eigendomsterrein”) cu ta den groengebied, a bin dilanti demostrando nan preocupacion pa cu e ley nobo aki cu Gobierno kier implementa entrante 1 di Mei 2019. Dicon tin tanto purá asina pa e ley pasa??

Mester duna oportunidad pa por tin claridad riba e ley nobo aki. Nos ta di opinion cu un ley di un embergadura asina grandi no por wordo “bulldozed” den Parlamento. Ta pesey nos ta kere cu e introduccion di e ley aki mester wordo posponí te ora cu e pueblo haya e claridad necesario y cu a tene suficiente cuenta cu nos preocupacionnan y interesnan di pueblo.

Poniendo un paro total, unilateralmente y sin consulta cu esnan involvi, na nos minanan ( excluyendo Gavilan y Sero Thijshi) lo tin consequencianan socio/economico y financiero pa nos pueblo.

Importacion di material ta trese cune cu prijs lo bira extremadamente halto. Un cas ta pertenece na prome necesidad, pa un famia tin un dak riba nan cabes. Un famia cu mínimumloon no lo por yega na nan mes vivienda a base di e prijs nan halto a consecuencia di importacion di santo y piedra.

Gobierno a kaba di otorga tereno pa construi cas! Cu e acto aki por bisa cu di un banda ta duna y na mes momento ta kita bek pa motibo cu no por cumpli cu exigencianan pa construi un kas paso e prijs pa construi un cas lo bira absurdamente caro !!

Alabes huurprijs di casnan social (FCCA) automaticamente lo subi.

Projectonan di infrastructura lo tuma mas tempo pa motibo cu no por haya material pasó lo mester warda pa esaki yega. Esaki tur lo costa gobierno mas.

Min. Otmar Oduber a garantisa e representantenan dialuna mainta 11 di Maart 2019 cu tur 3 exigencianan den e manifiesto lo wordo atendí :

1. Duna e companianan envolvi e un “overgangsperiode” manera Min. Oduber a menciona den su rueda di prensa dia 22 Februari 2019 por inmediato.
2. Cuminsa un dialogo social den tur aspectonan económico y social financiero pa evalua e consequencianan.
3. Lanta un comision na unda representantenan di companianan envolví ta wordo invita pa partisipa pa buska y yega na un solushon favorabel pa tur 2 partidonan.

No mas tarda cu diaranson otro siman dia 20 di Maart 2019 un Decreto Ministerial lo wordo publica pa lanta un comision na unda representantenan di e grupo aki ta haya partisipacion.

Nos ta completamente pro cuida nos flora y fauna y medio ambiente , pero di e otro banda nos ta kere tambe cu cobamento di santo y piedra ta un necesidad primordial pa nos comunidad.

Comments

comments