Horacio Oduber Hospital a tene un open dag na clinica di Oncologia specialmente riba e dia aki studiante di Colegio EPI, specificamente di e unidad “verpleging”. E open dag aki tabata pa e grupo di klas 2, klas 3 y klas 4 di EPI unidad “verpleging”. Yolanda Levestone, nurse na clinica di oncologia, a comenta cu e dia tabata uno special mirando cu HOH ta desea di inspira e studiantenan pa sigui cu nan pasion pa cuido y haya sa mas tocante oncologia. Studiantenan tabatin hopi pregunta y mas cu claro esey ta yena di team di oncologia cu hopi emocion.
E team di oncologia a prepara un total di seis diferente post pa e studiantenan cera conoci di cerca kico e trabou aki ta encera. E prome post tabata e balie, sigui pa un audiencia cu e oncologonan y tambe nan a cera conoci cu e “behandelkamer”, cu ta caminda e studiantenan por a mira e diferente investigacion cu e specialistanan ta haci. Ademas, e studiantenan a cera conoci cu e proceso di “verpleegkundige spreekuur” cu ta e prome contacto cu e pashent tin cu e dokter. Tambe tin e telefonisch gesprek, caminda nan ta yama e pashent pa haya sa con a bay.
Durante e open dag e intencion tabata pa e studiante mira di cerca con e rutina completo ta na clinica di oncologia. A atende alrededor di 40 studiante di Colegio EPI unidad “verpleging”, nan a mira y siña tocante e proceso na clinica di oncologia. Danki ta bay na e team completo na clinica di oncologia cu a organisa e open dag y alabes na e studiante y maestronan di Colegio EPI cu a atende e dia aki.
