E groundbreaking ta e prome stap pa tin e infrastructura cla pa pone e prome mast pa instalacion di e sistema di radar. Segun Minister Bikker, esaki ta un di nan pasobra na diferente area lo pone mast pa e radar por haci su cobertura maximo. Ta haciendo tur preparacion pa ora e ekipo yega e infrastructura ta cla y mesora por instala e radar pa cuerpo policial opera nan. Un tempo cuerpo policial tabatin radar pero na 2011 pa un motibo of otro no a sigui cu esey. Pero e gobierno aki a pone den su maneho cu vigilancia di Aruba su costanan ta necesario, principalmente si mira e situacion sin precedente cu ta experencia di pais Venezuela. Mirando e situacion social di e pais, por sinti e efecto aki na Aruba tambe. Esey a haci cu ta bay pone atrobe e radarnan pa cuerpo policial. Un par di siman atras a formalisa tur papel pa haci pedido di e radarnan y por bisa cu e ekiponan ta biniendo direccion di Aruba. Pa ora nan yega ya tin e infrastructura cla pa haci e instalacion pa nan por opera mesora. Ta bay lease e ekiponan di radar for di e compania Sea-Hawk cu ta fabricante di sistema di radar. Nan ta responsabel pa funcionamento di e ekipo y kico cu pasa lo ta parti di un all inclusive lease cual suma ta wordo paga pa luna. Pa a logra e radar a haci un Request For Information y un comision a keda instala pa traha cu e companianan cu ta interesa di cual Sea-Hawk ta esun cu a keda recomenda. E compania SafeCom ta e compania cu ta encarga cu construccion di e torennan pa e radar. Construccion di e prome mast ta na KIA y tin duracion di seis siman. Despues lo bay warda di polis San Nicolas pa traha e segundo mast. E mast den cura di KIA tin un largura di 18 meter y esun na warda 15 meter. Di parti director di KIA , Sr. Winklaar el a bisa cu KIA solamente a duna permiso pa haci construccion di e mast riba nan tereno. Debi cu e mast ta poni na un punto strategico riba e isla e ta manda su señal pa Cuerpo Policial na San Nicolas y despues e señal ta pasa pa su centro na Macuarima. E radar lo bira e netwerk pa yuda Cuerpo Policial patruya Aruba su costanan.