Dialuna mainta a tuma luga e prome groundbreaking haci na e prome rotonde cu lo ser traha riba e proyecto di caminda nobo cu ta Watty Vos Boulevard, miho conoci den pueblo como Ringweg 3. Director di DOW, Marlon Croes, a splica cu e ta un proyecto cu tin hopi aña den preparacion. Na 1989 Croes a cuminsa traha na DOW, cual ta basta tempo pasa y ya nan tabata papia di Ringweg 3 e tempo ey. Na 1995, Director Jossy Figaroa, a comenta na Croes si e por trek e proyecto aki. Tin basta tempo cu e proyecto aki ta canando cun’e, unda cu a pasa hopi tempo. DIP, e tempo ey Domeinbeheer, hunto cu DOW a negosha compra di tereno pa por haci e parti ey liber pa por cuminsa cu e proyecto. E ta un caminda largo y unda cu a bin cla cun’e cu e ultimo acuerdo na 2014 na Februari. Esey a duna e habilidad cu por a cuminsa cu e destaho, concurentie dialoog, via un PPP pa por otorga e trabao na e contratista.
Banda di esey e motibo pakico cu a cuminsa cu e proyecto aki ta cu den transcurso di aña a haya hopi crecemento den nos trafico. Por corda na aña 1992 pa 1995, tabata tin rond di 25 mil auto na Aruba. Awendia nos tin 77 mil auto, cu ta papia di un triplifacion di e cantidad di auto na Aruba y pa por tene e actividadnan social, hopi di nos ta haci uzo di auto pa nos bay scol, bay trabao, haci tur nos actividadnan social. Esey a trece cun’e cu tin fila tur caminda rond di Aruba riba nos infrastructura. A experencie dilanti di Smith Boulevard, dilanti cas di Gobernador bay direccion Citgo Boulevard. A experencie riba e prome ringweg cu ta core di Vondellaan, Verbindingsweg, De La Sallestraat, etc. Por wak’e riba Ringweg 4 Kibaima/Tanki Flip. El a bay asina leu cu e ta cay riba e caminda di Jaburibari, Calabas, Kudawecha, Sabana Liber y Noord, unda cu mayoria di e empleadonan ta traha den e sector hotelero.
Tur e camindanan aki ta pega. Si ripara Kibaima/Tanki Flip, 15 aña pasa e tabata pega mainta, merdia y atardi. Awor aki e ta pega practicamente casi tur ora. Es decir cu nos tin hopi trafico cu nos tin cu fluha cun’e, segun Croes.