Grot di Lourdes na Weg Sero Preto San Nicolas ta habri tur dia pa asina esnan cu kier haci un oracion por yega, subi haci esaki y durante di aña miles di devotonan na Mama Maria y tambe turistanan ta bishita e lugar aki pa asina haci nan oracion. Pa basta tempo e comision a bin ta haya diferente peticion y sugerencianan di cual 2 sigur a bin ta resalta ultimamente, e prome ta pa busca un manera pa asina esnan den rolstoel por subi te na e parti mas halto cerca di e altar y e di dos ta si por contrui un baño vooral pa hende muher y esnan di edad mas avansa por usa durante di nan bishita na e luga di oracion. Comision despues di a evalua ambos peticion a yega na e conclusion cu ambos proyecto lo mester wordo ehecuta lo mas pronto posibel y si ta posibel prome cu e tempodada di fin di aña cu lo bira alabes e temporada di yobida na nos isla. Durante e luna di Augustus a organisa nan prome evento yama Ban Topa pa asina cuminsa recauda fondo pa construccion di un rampa special pa esnan den rolstoel por yega mas cerca di e altar na Grot di Lourdes. E actividad aki tabata exitoso pero no a logra recauda tur e fondonan necesario un trabao di e magnitud aki, pero danki na e cooperacion di e contratista y tambe di un comerciante generoso e proyecto por fin a cuminsa y haya forma. Pa es motibo e comision a haya nan mes obliga di haci un di dos actividad pa asina por termina e proyecto aki cu ya a cuminsa haya forma y di e forma aki duna tur esnan den rolstoel e oportunidad di jega mas cerca di e altar y imagen di Mama Maria na Grot di Lourdes. E actividad di recaudashon di fondo aki lo tuma luga diasabra awor 5 di November na Centro di Bario Brazil cuminsando pa 5or di atardi cu bendemento di diferente articulo y areglonan di Pasco, un vlooienmarkt bastante extenso, cosnan dushi pa drenta den e ambiente di fin di aña y sin laga afo cu lo bay tin un bar y cushina bon surti. E actividad ta cuminsa pa 6or di atardi y lo bay te cu 10or di anochi y lo conta cu animacion musical di Aguinaldo Flor di Pasco cu recientemente a bautisa nan CD nobo nobo “Nos Tey Atrobe” y pa sera e anochi lo bai tin presentacion di Grupo di Betico cu lo bin contagia tur hende cu nan Alegria. Pa esnan cu lo desea mas informacion of kier haci cualkier tipo di donacion por yama e presidente di Comision Grot di Lourdes Sr. Werleman na telefoon 561-2388 of e tesorera Sra. Geerman na telefoon 594-0669 libremente. Pues un invitacion na henter e pueblo di Aruba pa bin disfruta di e ambiente di Pasco diasabra awor 5 di November den Centro di Bario Brazil y na mesun momento contribui na un bon causa cual ta e construccion di un rampa special pa rolstoel y un baño na Grot di Lourdes. Entrada pa e actividad aki ta completamente Gratis pues nos ta wardabo.