Aunke ATIA a haya un presentacion di parti di Minister di Husticia pa loke ta criminalidad e ta keda un tema di preocupacion grandi pa ATIA segun directora di ATIA Sra. Michelle de Groot ta splica.
E presentacion tabata uno haci conhuntamente cu Warda Nos Costa, Imigracion y KPA entre otro, riba e tema di criminalidad y kico ta esfuersonan cu ta wordo haci. ATIA ta aprecia tur e esfuersonan cu ta wordo haci pa combati. Y aunke cu e casonan di atraco ta wordo resolvi toch basta lihe, esaki ta keda pa ATIA un punto di preocupacion. Cada atraco, sea riba local of turista, ta uno di mas. Pero mas y mas e ta wordo haci ariba turismo, y esey ta nos pilar economico.
E turista ta kies pa Aruba pa motibo di nos siguridad y ta importante pa frena e atraconan ya cu e tin consecuencianan emocional pa e victima pero tambe ariba nos economia. ATIA ta haci un apelacion na tur instancia concerni, tambe riba e ciudadanonan pa keda alerta y contribui pa duna informacion na polis, reporta casonan y personanan cu ta actuando sospechoso. Ultimamente esaki tabata tin hopi exito y casonan ta wordo resolvi hopi mas lihe.
Sra. De Groot a sigui splica cu e ta un caso cu ta responsabilidad mayormente riba e departamentonan di husticia, pero e ciudadano tambe por aporta y contribui na esaki.
Dialuna ministerio di Husticia ta organisando un anochi di informacion pa miembronan di ATIA, AHATA y Camara di Comercio. ATIA, hunto cu e departamento di PR di KPA, ta bezig ta wak si por organisa algun anochi di informacion caminda nan por informa comerciantenan con pa evita cierto situacionnan. Di parti di ATIA esaki ta pa miembronan di ATIA.
Segun comercio, hopi biaha nan ta victima y e autoridadnan no ta presente, y ATA ta di opinion mester enberdad mas presencia, y tur esfuerso ta wordo haci pero toch e atraconan ta pasa of otro actonan di criminalidad. Y e presencia di Polis, di Siguridad na companianan ta importante. Ta mas facil pa bisa, cu tin toch e limitacion di capacidad, pero ta keda un punto cu mester pusha mas, segun ATIA.
Mester wak kico ta otro opcion tin pa e comerciantenan, cu antes tabata tin permiso pa carga arma, pa nan tambe yuda na disminui e criminalidad enbes di ta arma. Asina Sra. Michelle de Groot, directora di ATIA a splica.