Diahuebs ultimo dia 13 di september 2018, Grant Thornton a organisa su prome seminario titula ‘Change’.
Durante e seminario aki, Rachel Maduro, Directora di Impuesto na Grant Thornton y Melina Rangel, Consehero di Impuesto na Grant Thornton a duna una presentacion tocante leynan relata na e ultimo cambio relaciona cu BBO / BAZV usando ehempelnan practico y interesante. Alabes nan a elabora tocante e implementacion di BAVP. Aki tambe a bin dilanti diferente cambionan manera e introducion di e ‘kleine ondernemingsregeling’ y e ‘verleggingsregeling’. Tambe casosnan cu a aparese dilanti corte a wordo mentiona di cual por tin impacto benefisioso pa empresarionan. E profesionalnan di Grant Thornton a duna un splicacion con e calculacionnan di BBO, BAZV y BAVP aki mester wordo haci na e manera corecto.
Lance Henriquez, tambe Consehero di Impuesto na Grant Thornton, a trata e cambionan cu a tuma lugar recientemente den e area fiscal na Curaçao. Di e manera aki bishitantenan cu ta haci negoshi cu nos hermana isla a keda mas miho informa tocante e diferente posibilidadnan.
Nos profesionalnan di ‘Advisory Services’ a duna un presentacion tocante e tema di ‘Change Management’ y e impactonan interno cu esaki por trece pa un organisacion. Edsel Lopez, Partner na Grant Thornton, a comparti cu audiensia kiko ‘Change Management’ ta ensera en general. Como ‘business case’ señor Lopez a usa e transicion cu a tuma luga recientemente den e compania y e puntonan di enfoke y enseñanza cu compania por saca afo. Roban Herk, Consehero na Grant Thornton, a toca aspectonan interno di cambio y a elabora riba e punto di cambionan cu ta tuma luga na momento cu un compania ta pasando dor di un transicion.
Hans Ruiter, Partner na Grant Thornton, a finalisa e seminario cu un presentacion tocante e cambionan den ley relaciona cu ‘Vergunningsverordening’. Durante di esaki, el a duna un splicacion extenso tocante e cambionan di definicion di ‘Lodging’, ‘Hotel’’ y ‘Timeshare’ y e consecuensianan cu esaki lo trece cune. E impacto di e cambionan aki lo bai ta considerabel riba e sector hotelero, tambe riba e ‘long stay accommodations’ y tambe estadia na casnan, mihor conoci como Airbnb.