Aruba Volleyball Association hunto cu IBiSA y Studiantenan di Universidad di Aruba ta organisa e weekend venidero aki – dia 29 y 30 di April 2017 – un grandioso Torneo di Beach Volleyball pa tur Scol Secundario di Aruba (4/4) y un Campeonato Semi-Pro (2/2) pa tur Atleta di Beach Volleyball.
Inscripcion ta habri caba y por registra na [email protected] of na [email protected] i/of por tuma contacto cu tel.nr. 568 4166 pa mas informacion.
E Torneo Escolar di Beach Volleyball lo tuma luga na Eagle Beach tanto den categoria di dama como di cabayero. Cada Scol por wordo representa pa un Team di Dama como un Team di Cabayero y cada Team mester consisti di 4 studiante. Pa e Atletanan Semi-Pro tambe tin 2 categoria (dama y cabayero) unda lo competi 2 / 2 contra otro. Tanto e Torneo Escolar como e Campeonato Semi-Pro lo cuminsa diasabra pa 10:00am di mainta te cu 5:00pm di atardi y lo continua diadomingo na e mesun ora cu e weganan di semi-final y final.
Tanto e Teamnan Escolar Campeon y Sub Campeon y e Duo Campeon y Sub Campeon di Semi-Pro lo bay forma parti di e sistema di registracion oficial pa futuro campeonato y torneonan tanto local como internacional.
Un cordial invitacion ta bay na tur Studiante di Scolnan Secundario pa forma un Team y representa bo Scol na e Torneo Nacional di Beach Volleyball pa Scolnan Secundario y tambe na tur Atleta di Beach Volleyball.
Aruba Volleyball Association y IBiSA ta spera di por conta cu un participacion grandi di parti di e scolnan secundario y tambe di tur Atleta di beach volleyball competitivo. Dianan 29 y 30 di April venidero – weekend di celebracion di Rey su cumpleaño – lo bay tin weganan competitivo, ambiente y e amistad deportivo lo reina na Eagle Beach cu e disciplina di beach volleyball.