Un bes mas nos ta bay haya e evento di Centro Kibrahacha pa loke ta e Bazaar cu ta hopi gusta tur aña pa nos pueblo pa cual aki Sr. Jeffrey Matos ta splica.
E bazaar lo ta diadomingo awo, 5 di November. E ta un actividad anual pa crea fondo pa Centro Kibrahacha por sigui draai y sirbi nos grandinan aki na Aruba. Durante henter aña Kibrahacha ta haci varios actividad cu nos grandinan, for di tur distrito di Aruba. Pero e bazaar di Centro Kibrahacha ta special, ya cu comercio ta contribui cu nan, pa medio di sponsor diferente articulo cu nan por bende durante nan actividad y asina recauda fondo.
Na e actividad aki, comercio ta contribui grandemente, ta comparti cu e centro pa asina nan por sigui traha pa nos grandinan.
Durante aña Centro Kibrahacha tabata hopi activo y den 2018 nan tin hopi plannan pa sigui amplia e actividadnan, y amplia e servicionan pa nos grandi. Tambe pa wak con pa recauda mas fondo como fundacion pa nan por traha na e bienestar di nos grandinan.
Como fundacion, Centro Kibrahacha ta haci diferente estudio y nan ta haciendo actualmente un investigacion, pa mira kico ta e necesidad bou di e grupo di 60+ na Aruba y asina cumpli cu e necesidad cu tin na Aruba. Centro Kibrahacha ta premira e cambionan aki y nan ta preparando pa e cambionan aki, segun Sr. Jeffrey Matos, di Centro Kibrahacha.