E contratistanan pa loke ta Green Corridor ta trata todo por todo pa keda cla parti dilanti, unda cu e bisiña of habitante di e casnan cu ta biba dilanti, haya menos molester cu ta posibel, esaki na Pos Chikito. Si tur cos cana bon, gran parti lo keda cla prome cu fin di aña, segun Jossy Kock di DOW.
E no lo ta completamente cla, pasobra tin cu corda cu e ultimo parti di e proyecto total, ta e parti berde, unda cu plantacion mester bin, lo keda te ultimo. Nan no ta bay planta e parti berde den un periodo ainda cu tin construccion ta andando.
Kock a sigui splica cu ora cu yega e parti di temporada ey, vooral e parti cerca di pasco, naturalmente e mashinnan cu tur e resto di ekipo lo wordo hala for di e parti di construccion cu ta tumando luga. Nan lo sigui traha si, pero pa trata di trece menos molester cu ta posibel.
Gran parti di e caminda ta hayando su capa di asfalt. Ta keda un parti cu ta na Rooi Koochi. Esey nan lo trata todo por todo pa tambe haya su capa di asfalt prome cu fin di aña of prome cu temporada di fiesta.
Kock a indica cu e contratista lo haci tur lo posibel pa logra unda cu tin caminda habri pa logra pone asfalt na dje. Si no ta asina cu e no por logra, e lo lag’e toch hopi accesibel cu nan por yega sin hopi molester, Kock a splica.