Fundacion Misioneros di Jesus Aruba hunto cu nan coordinado spiritual Pastoor Coby Henriquez tin e grato placer di invita comunidad di Aruba pa un “Congreso di Sanacion y Liberacion”. Durante e congreso lo tin como invitadonan Reverendo Pastor Marcelino Gonzalez Tejedor for di Panama, Docter Marco Aurelio Urizar, director di Los Misioneros de Jesus Guatemala y e predicado internacional Neil Velez for di New York.
Manera tur aña e Fundacion di Misioneros di Jesus Aruba ta organisa un congreso unda cu un cantidad grandi di fielnan di Aruba ta bini hunto p’asina scucha mas di e palabra di Señor, aumenta nan Fe, haya sanacion spiritual y fisico.
E congreso tin un duracion di 3 dia, cual lo tuma luga riba diabierna 16 di September 2016 na Sportboys na Santa Cruz di 7:00 pm – 10:00 pm, riba e dia aki e entrada ta completamente GRATIS. E di dos dia ta diasabra 17 di September 2016 na Club Caiquetio na Paradera di 7:00 pm – 10:00 pm, entrada ta unicamente 10 florin. Ta finalisa e congreso riba diadomingo 18 di September 2016 na Renaissance Convention Center di 9:00 am – 5:00 pm, unda cu lo bay tin na final un Santo Sacrificio di Misa, e entrada ta un donacion di 25 florin.
Carchinan ta obtenibel na El Gallo Rojo, Refresqueria Mayor, Botica Santa Ana y The Smiling Shop. Pa mas informacion por yama 730-2055 of bishita e pagina di Facebook di Misioneros de Jesus Aruba.
Riba potret por aprecia señor Nayo Schoop coordinado di Misioneros de Jesus Aruba, señora Margriet Geerman miembro di e fundacion y señor Roderick John lider di e projecto aki. Adicional por aprecia señora Daya Acevedo di El Chalan y señor Stanley Dabian PR y comunicacion di e Departamento di Cultura Aruba.
Misioneros di Jesus kier gradici tur persona y instancia cu di un of otro forma ta yudando pa haci evento aki realidad.
Comunidad completo di Aruba ta keda cordialmente invita pa pasa busca bo entrada y asina ricibi e sanacion tan anhela.
