Un tiramento a tuma luga diabierna den e gran sala di concierto Crocus City Hall, ubica den e provincia di Moscu. A reporta cu e atake a laga un gran cantidad di victima.
RIA Novosti a reporta cu varios persona camufla y arma cu fusil a drenta den e sala di concierto Crocus City Hall y a cuminsa tira contra e bishitantenan.
A difundi e informacion cu e tiramento a cuminsa den e sala mes y den e hardrei n’e mesun momento. E atacantenan, segun reporte, a cende candela den e boothnan di e sala y e candela rapidamente a placa den casi henter e edificio.
Te asina leu no sa e cantidad oficial di victima. Mientrastanto, a difundi reporte cu por lo menos 12 persona a fayece y 35 a resulta herida.
Mas di 50 ambulance a wordo manda n’e luga.
Fuera di esey, n’e luga a cuminsa un candela fuerte y a reporta cu e dak a cay den otro. Segun reporte, 100 persona ta atrapa den Crocus City Hall.
TASS a reporta cu referencia n’e servicionan di emergencia, cu a registra un explosion den e sala di concierto.
For di e servicio di emergencia a señala cu a tuma luga evacuacion di e edificio.
Gobernador di e provincia, Andrei Vorobiov, a dirigi n’e luga di e echo. El a señala cu a crea un grupo di trabao operativo.
E atake a tuma luga prome cu e concierto di e banda di rock Ruso Piknik. E musiconan no a resulta herida.
Dependiendo di e configuracion di e sala, Crocus City Hall tin e capacidad pa carga mas di 9 mil persona. No sa cuanto hende tabata den e luga.
