Un cantidad di persona a wordo deteni diahuebs despues di un operativo anti terorista na Viena, y den e ciudad di Graz, zuid di e pais. Den e operativo aki a participa un gran cantidad di polis, segun medionan di comunicacion Austriaco.
Ta trata aki di un operativo dirigi contra di un grupo di supuesto gruponan Islamico procedente di ex- Yugoslavia y cu tabata bou vigilancia di autoridad pa varios siman caba.
Mayoria di e detencionnan a tuma luga na Graz, e di dos ciudad mas grandi di Austria, cu a conta cu despliegue di por lo menos 600 polis.
Ministerio di Interior Austriaco a nenga di duna cualkier comentario na Viena, relaciona cu e circumstancia cu e rondona e operativo y a bisa solamente cu esaki ainda no a caba.
E detenidonan ta wordo acusa di kier forma un grupo radical Islamista na Austria, siguiendo e ideanan di Mirsad O., alias “Ebu Tejma”, un predicado Islamico, di origen Bosnio. E ultimo aki a wordo condena aña pasa na 20 aña di prizon, dor di un Tribunal di Graz, pa recluta combatientenan pa e grupo terorista “ISIS”.
E operativo anti terorista a coincidi cu e huramentacion di e presidente Federal Austriaco, e ecologista Alexander Van der Bellen.