Recientemente ex Prome Minister y lider di partido AVP a bin dilanti den prensa unda cu el a duna un presentacion relaciona cu e Business Perception Survey Q2 2018, unda cu e lo a haci uzo di graficonan di Banco Central pa asina expresa su preocupacion pa cu e direccion economico cu nos pais ta bayendo. Segun Sr. Eman, Aruba lo ta core peliger di cay den un recesion.
Pa sostene su ponencia, Sr. Eman a mustra graficonan cu lo el a haya di Banco Central di Aruba. Esaki sigur a crea un polemica, ya cu segun opinionnan, con bin Sr. Eman tabata tin acceso na graficonan di Banco Central?
E titular di Finanzas y Economia, mr. Xiomara Ruiz- Maduro a manda pidi Banco Central pa un splicacion ariba esaki.
Banco Central di Aruba ta nenga categoricamente di cu e graficonan uza den e presentacion di Sr. Mike Eman, relaciona cu Business Perception Survey, lo ta di Banco Central. Por lo tanto, Banco Central di Aruba ta nenga cualkier involucracion pa cu e presentacion aki.
Tambe Banco Central a manda Minister Ruiz – Maduro un copia di e Business Perception Survey Q2 2018.