Departamento di Registro Civil, manera cu nos tur sa, den e ultimo dianan cu a pasa, a tene un cambio den nan sistema. Esaki, segun Goward Bikker, ta pa un opschoningsproject, caminda cu na September tabata tin un destaho publico y un compania na Corsou a gana esaki.
E ta sigui splica cu conhunto cu IASA y AZV, Censo a haci un comparacion di dato. Den esaki a haci un analisis profundo di e calidad di e file pa bin cu cierto cifranan pa sa cual ta e casonan di duda (twijfel gevallen), kendenan lo haya un carta. A parti’e den tres caso di duda.
E hendenan cu por ehempel ta biba na Aruba, ta inscribi na Censo, pero no ta conoci na AZV y no tin un carchi di AZV valido, ta un caso di duda. Si bo ta un persona cu si ta conoci na Censo y AZV, pero e carchi di AZV a caduca y no a renoba e carchi. E di tres caso ta esunnan cu tin mas cu un aña for di Aruba.
Hunto cu IASA a haci un analisis. Tin 800 persona den e casonan aki, cu tin mas cu un aña biba for di Aruba. Ta asina cu bo ta biba afo, bo tambe ta un di e casonan aki cu lo haya un carta na bo adres bieu of cu ta registra na censo. Asina ta traha e analisis, hunto cu e departamento cu a caba di menciona. Fuera di esey por a parti e analisis den varios nacionalidad pa tin un bista di e grupo di hendenan cu ta papiando di dje awor aki.
Ta asina cu e grupo di mas grandi, ta e nacionalidad Colombiano. E di dos ta nacionalidad Venezolano. Di tres ta nacionalidad Haitiano, Chines ta sigui, Hulandes y entre nan tin tambe Arubiano cu nacionalidad Hulandes cu ta biba na Aruba por ta, pero no tin un carchi valido y tin mas cu un aña biba afo di Aruba. Esey ta un analisis cu a haci hunto cu e departamentonan. Cada biaha ta keda haci e analisis aki pasobra ta den e proyecto y lo caduca na Februari. Mientras tanto lo keda update e informacion aki. E situacion por cambia. Pero te ainda e caso ta asina cu ta trata di 11929 caso di duda, segun Bikker.