Temporada di Carnaval ta den full swing. Un temporada dushi, pero tambe un temporada unda nos mester cuida nos salud pa evita consecuencianan cu por tin su efectonan pa bida largo.
Departamento di Salud Publico ta keda encurasha mayornan pa cuida y proteha nos muchanan menor di 5 aña y no hiba nan actividad di Carnaval. E realidad ta cu nan no ta gosa di Carnaval manera mucha mas grandi of persona adulto. E dia ta mucho largo y druk pa nan. Muchanan ta cansa lihe y por bira fastioso, nan mester di nan sosiego di tur merdia y bon proteccion pa solo cu ta fuerte y pa asina no deshidrata.
Mayornan cu ta bay actividadnan di Carnaval cu mucha mester tin bon bista riba nan constantemente pasobra ta facil pa perde un mucha for di bista, mucha por pasa facilmente bou baricada cu peliger pa keda atropea pa trucknan cu ta pasa. Ademas e zonido ta mucho duro pa nan y por causa daño inreparabel na nan oido. Na nos hobennan y participantenan cu ta gusta baila cerca di e speakernan proteha boso oido pasobra esaki por causa daño permanente na bo oido.
Directie Volksgezondheid ta haci peticion na tur participante y mirones pa semper uza earplpugs y proteha bo oido na tur momento.
Un otro factor cu DVG ta pone hopi atencion na dje ta solo. E paradanan den dia ta hopi ora largo y un persona ta wordo exponi tur e oranan aki na e rayonan dañino di solo. DVG ta conseha publico y e participantenan den Carnaval pa bebe suficiente awa of likido pa no deshidrata. Bisti un pechi of sombre y para den sombra pa proteha contra solo y si bo ta den parada percura pa bo headpiece ta di tal manera cu e ta cubri bo cabes. Uza bril di solo cu UV protector pa proteha e wowonan y no lubida di hunta sunblock pa proteha bo cuero contra e rayonan di solo. Corda cu sunblock mester wordo aplica di nobo caba pasa 1-2 ora pa por garantisa un bon proteccion.
Cancer di cuero no ta desaroya di un dia pa otro pero si despues di un temporada largo di exposicion na rayonan fuerte di solo cu nos na Aruba no por evita.
Pa mas informacion por tuma contacto cu Departamento di Salud Publico na telefoon 522-4200 of sigui nos riba nos Facebook Directie Volksgezondheid Aruba.