TECNOLOGIA
CALIFORNIA, Merca – E gigante tecnologico Google a anuncia awe e cierre temporal di un di su plataformanan, Google+, pa motibonan relaciona cu erornan di siguridad den e acceso na datonan priva di usuarionan afecta, cu lo por yega te na mei miyon di cuenta.
Segun un comunicado di e compania, e clausura lo wordo efectua den un termino di dies luna y lo afecta solamente e version di “consumidor” di e aplicacion aki, unda cu a haya erornan di siguridad cu ta permiti otronan pa tin acceso na datonan priva di e internautanan.
“Debi na e retonan aki y e uzo abao di e version di e consumidor di Google+, nos a dicidi di cera e version di e consumidor di Google+”, e compania a bisa den un comunicado.
Den e sentido aki, el a precisa cu nan no a haya indicacion di cu e datonan aki a wordo uza den un forma negativo.
“Nos no a haya pruebanan di cu niun desaroyado tabata consciente di e eror aki, of cu nan a abusa di esaki. Tampoco nos a haya informacion di algun profile cu a wordo uza di manera negativo”, Google a informa.
E eror en concreto ta implica cu e aplicacionnan externo aki tin acceso na datonan di e usuario cu nan a wordo comparti door di dje, pero cu no tabata publico, según Google.
“E datonan aki ta limita camponan estatico y opcional di e profile di Google+, manera e nomber, e emailadress, ocupacion, genero y edad”, e compania a informa.
E eror a wordo descubri na maart di e aña aki y a wordo coregi di biaha, e empresa cu sede na California a indica.