Den un reunion cu a tuma luga 4 di September, Minister di Desaroyo Territorial, Infrastructura y Medio Ambiente sr. Otmar Oduber conhuntamente cu directiva di Camara di Comercio, a trata e tema di maneho di desperdicio y cobransa.
Camara di Comercio mescos cu Pais Aruba ta pone enfasis riba e importancia di esaki y ta sostene e pensamento di e maneho pa laga cada ciudadano carga su responsabilidad pa recogemento y procesamento di desperdicio na un forma responsabel na Aruba.
E organisacion a trece diferente strategia dilanti cu Gobierno lo por aplica pa guia e proceso di introduccion y diferente opcion di implementacion (A corto, medio y largo plaso). Minister Oduber a duna oido na e sugerencianan aki, specialmente e plan a largo plaso cu ta encera introduccion di incentivanan fiscal.
Pais Aruba y Camara di Comercio ta pone enfasis riba e necesidad pa tin mas conscientisacion pa yuda mehora comportacion di e ciudadano ora cu ta trata produccion y maneho di desperdicio. A enfoca riba e importancia di conscientisacion pa siña ciudadanonan pa reduci, re uza y recicla articulonan pa finalmente baha e cantidad di desperdicio produci.