HAVANA, Cuba – E Gobierno di Colombia y Forsanan Arma Revolucionario di Colombia (FARC), a anucia un acuerdo nobo di paz, despues di e referendum di dia 2 di October caminda cu e opcion di NO na e prome documento traha di e combersacionnan pa caba cu e conflicto. E anuncio a yega tras di nuebe dia di reunionnan intenso na Havana caminda cu a discuti e propuestanan di esnan cu tabata contra di e acuerdo cu e guerilla, entre nan, e ex presidente y senador Alvaro Uribe.
Humberto de la Calle, hefe negociador di Gobierno, a bisa cu tras di e resultado di e referendum, e partinan a compronde cu tabata necesari traha en busca di un acuerdo nobo.
“Tabata un esfuerso genuino, leal, cu a permiti nos recompila tur e iniciativanan,” el a afirma.
“E ahustenan no ta sacrifica e conviccionnan cu a duna forma na e prome acuerdo.”
“Mi a bisa cu e acuerdo di dia 26 di September tabata e miho acuerdo posibel,” el a comenta. “Mi ta reconoce cu e acuerdo aki ta miho.”
Ademas, el a señala cu e acuerdo aki ta un oportunidad nobo pa aclarea duda. “Pero riba tur cos, pa uni nos.”
Posteriormente, Ivan Marquez, comandante di FARC, a tuma palabra.
“Nos ta presenta na e nacion un acuerdo nobo, cu nos ta yama aco, acuerdo di speransa,” el a bisa.
“Nos a traha pa yega na e acuerdo final riba cual nos ta traha un paz stabil y duradero,” el a añadi.
El a reconoce cu, pa e acuerdo nobo, FARC a cede “te na e limite di lo rasonabel y aceptabel” y a bisa di warda pa e Ehercito di Liberacion Nacional por uni na e negociacionnan di paz.
Modificacion
Entre e novedadnan di e acuerdo anuncia awe a inclui puntonan manera e creacion di un inventario di bienes y activos di FARC pa repara e victimanan, mescos cu e no presencia di magistradonan stranhero, definicion di e enfoke di genero y libertad di culto den e implementacion di lo acorda. Ademas, nada lo tin cu afecta e derecho na propiedad priva.
Den un comunicado, e Gobierno a bisa cu na final di dia por consulta riba internet un documento cu e modificacionnan y e elementonan nobo. E acuerdo nobo den su totalidad lo keda disponibel den e proximo dianan.
Reaccion
Presidente Santos a anuncia cu e lo duna un mensahe na e pais pa papia riba e acuerdo.
Claudia Lopez, senadora di e partido Alianza Verde, kende a haci campaña pa SI, a reconoce cu e acuerdo no lo laga tur hende satisfecho.
Tras cuater aña di dialogo, Gobierno di e presidente Juan Manuel Santos y FARC a firma na September e historico acuerdo cu cual ta pone fin na 52 aña di conflicto.
Sin embargo, den un referendum caminda cu e Colombianonan por a vota na fabor of en contra, realisa dia 2 di October, e triunfo pa e opcion di no, pa loke tabata necesario cuminsa cu combersacionnan nobo pa incorpora den e negociacionnan e propuestanan di e opositornan.
Uribe ta pidi tempo pa studia e acuerdo
Ex presidente Uribe a pidi cu e acuerdonan nobo pa nan no ta defintivo te ora cu nan wordo studia pa e voceronan di e opcion di NO y di e victimanan pa nan por haci observacion.
“Mi a pidi e presidente di e Republica cu e textonan cu ta anuncia di havana no tin alcance definitivo, cu ta poni na conocimento di e voceronan di No y di e victimanan, kendenan lo studia den tempo breve y lo expone na cualkier observacion of solicitud di modificacion den un reunion nobo cu un ekipo negociador di Gobierno,” Uribe a bisa despues di un reunion cu presidente Santos.
“Mi a insisti cu e presidente di e Republica e necesidad di un Acuerdo Nacional riba paz, cu ta inclui e institucionnan di husticia,” el a añadi.
Fuente: CNN en Español