CARACAS, Venezuela – E presidente Venezolano, Nicolas Maduro, a reuni diadomingo cu su homologonan di Cuba, Bolivia y Nicaragua, den marco di un homenahe na e ex mandatario Hugo Chavez den marco di cuatro aña di su fayecimento.
Como parti di e tributo, e presidentenan a instala na Caracas e di XIV Cumbre di e Aliansa Bolivariano pa e Pueblonan di “Nuestra America” – Tratado di Comercio di e Pueblonan (Alba-TCP), den compania di e representante di Gobiernonan Latino Americano.
“E cumbre aki nos ta realisando den e di cuater aña di e partida fisica di comandante Chavez, sin luga na duda un golpi hopi duro pa e movimentonan progresista di America Latina, Caribe y mundo, Maduro a expresa.
Segun e presidente Venezolano, tras e morto di Chavez “e imperio” a desplega “un descomunal guera economico” contra su pais, pero a sigura cu el a contraresta danki na e esfuersonan manera Alba-TCP, “base di e construccion di un America nobo.”
“Ta honra nos ta den e tera sagrado aki, di Simon Bolivar y di Chavez, tera cu ta representa un pueblo cu a lucha pa e independencia di nos America,” Mandatario di Nicaragua, Daniel Ortega a bisa periodistanan, ora cu el a yega Caracas madruga di diadomingo.
Depsues di Ortega, a yega Venezuela Evo Morales, presidente di Bolivia y Raul Castro, di Cuba, kende te awor aki no a duna declaracion.
“Nos a bin pa compaña e pueblo Venezolano y na henter e pueblo antiimperialista (…) Cada dia ta di lucha permanente contra agresion, politica y economico, manera esunnan di Merca. Tin paisnan cu nunca lo bay rindi danki na e lucha di Chavez,” Morales a bisa periodistanan.
Manera ta tradicion, e Gobierno lo realisa un acto di homenahe na e expresidente for di e Cuartel de la Montaña, west di Caracas, unda su restonan ta reposa.
Chavez, lider di e yamado “revolucion Bolivariana” tabata presidente di Venezuela entre 1999 y 2013, tempo cu el a muri na edad di 58 aña, tras di bataya casi dos aña contra un cancer, despues di a realisa mayor parti di su tratamento na Cuba.
Fuente: Globedia