Caracas, VENEZUELA.- Gobernador di estado Miranda, Henrique Capriles Radonski, diabierna a informa cu el a wordo inhabilita politicamente.
Capriles tabata wordo investiga pa Contraloria General di Venezuela pa supuesto dañonan patrimonial, presupuestonan redirigi y incumplimento di contracto. Entre e contractonan ta un negociacion cu e empresa Brazilero Odebrecht. Gobernador di Miranda a haya sa di esaki, na momento cu gobierno a cuminsa cu e proceso di investigacion na Januari y el a sigura es tempo ey cu e investigacion tabata e “construccion di e caminda pa mas padilanti duna nos un inhabilitacion”.
Contraloria General ya caba a yega di boet Capriles na dos ocasion: na Januari pa un suma di 43 mil Bolivar y e siman aki pa 41 mil Bolivar.
Diahuebs Capriles a bolbe subi cayanan di Caracas pa compaña oposicion den nan marcha cu tabata tin como meta yega na Defensoria di Pueblo. Pero forsanan di siguridad a reprimi e marcha. Capriles a resulta herida door di afixia.
Capriles, abogado di profesion y ex- presidente di e Camara Legislativa a enfrenta e regimen socialista dos biaha den e urnanan electoral. E prome biaha contra Hugo Chavez na 2012 y un aña despues contra di Nicolas Maduro. E tabata alcalde di Baruta y dos biaha gobernador di Miranda.
Fuente: www.eluniversal.com
www.ntn24.com