CARACAS, Venezuela- E constituyente Diosdado Cabello a anuncia cu e gobierno di Nicolas Maduro e siman aki lo presenta un oferta final pa cumpra Banesco, un di e banconan mas grandi di Venezuel. Diosdado a acusa e doño di Banesco, Juan Carlos Escotet di tabata kier a cumpra e accionnan di estado na prijs di baca flaco.
“Nos lo cumpra Banesco. El a ofrece nos e banco na prijs barata, pa 3.5 miyon dollar”, segun e dirigente a bisa diaranson den su programa di television ‘Con el mazo dando’.
“Escotet tabata kier a cumpra un porcentahe cu estado Venezolano tin na un prijs y nos a haci’e un contraoferta cual el a acepta, pa bende tur su accionnan na mesun prijs cu e tabata kier a cumpra esun di nos. Esey no ta trampa, toch?”, el a agrega.
Segun Cabello, tur cos ta practicamente cla pa e benta por wordo concreta y nacionalisa Banesco. “E siman aki caba nos a haci e oferta formal. Escotet ya caba ta preparando tur cos pa wordo firma y cla. Banesco lo bay forma parti di e Banco Publico”.
Na final di December, Cabello a plantea e posibilidad di nacionalisa Banesco, despues di cu e directiva a duna un oferta di cumpra e 2.34% di e accionnan cu estado Venezolano pa 387 miyon bolivar.
“Gobierno tin 2.34 por ciento di e accionnan y nan kier cumpra tur cu tur e trampanan cu e por”, Escotet a bisa e tempo ey.
Segun Bloomberg Billionaires Index, Escotet ta e unico Venezolano entre e 500 hombernan mas rico na mundo.
Escotet, ta yiu di inmigrantenan Spaño y ta presidente di e entidad Spaño Abanco for di Juni aña pasa y ta na cabes di banco Banesco di Venezuela, cu participacion di Merca, Panama, Puerto Rico, Republica Dominicana, Colombia y Spaña a traves di Abanca.
E empresario no a pronuncia su mes riba e anuncio di Cabello.
Fuente: http://www.elnuevoherald.com