Tin hopi presion di comunidad pa cu e servicio di hospital, pa cu e servicio di AZV. Tin comprension pa cu esaki y gobierno ta trahando tur dia ariba esaki. Ta trahando den direccion di trece cambio den e servicio. Minster di Salud, Sr. Dangui Oduber, ta splica.
Un di e problemanan mas grandi cu tin na hospital, ta e escasez di e cantidad di specialistanan. Pa cu esaki a tuma e decision di apunta un director nobo pa AZV. Gobierno ta trahando ariba un manpowerplanning, cu kico tur ta e necesidad di e hospital, pa loke ta trata personal, mirando cu tin un aumento di BAZV. Esaki ta pa cumpli cu e demanda, busca e personal cu tin escasez di dje, si mester busca dokter of verpleegster di afo, esey lo mester ta e caso. Lo mester tin e fondonan disponibel pa cu esaki cual ta esaki mirando e aumento di BAZV.
Ta haciendo e maximo esfuerso pa brinda e miho servicio cu por brinda bou di e circunstancianan cu nos ta aden, pero e ta un reto grandi pa cumpli cu e demanda grandi cu tin den comunidad. Cada bes e comunidad ta bira mas critico pa e servicio cu ta wordo duna na hospital, pero tur otro servicio cu ta wordo duna. Pa cu esaki tambe a tuma dos decision cual toch ta noticianan positivo pa comunidad. Un di nan ta cu lo bay muda e huisartsenpost, for di Eagle y lo bay pa e new bedtower, cu ta hopi mas espacioso. Lo bay amplia e orarionan tambe, e lo bay te cu 12 or di anochi. Asina ta baha e presion tambe pa SEH, cu ta pa casonan di emergencia so.
Si e no ta emergencia, e dokter di cas mes por atende na e huisartsenpost. Door cu nan ta situa banda di otro, e servicio lo ta hopi mas eficiente. Tin hopi critica ariba e servicio cu dokternan di cas ta duna. Lo bay introduci un aplicacion, cual lo dura tres luna pa e aplicacion keda cla pa bay live cun’e. Y pa 1 di Juni, esaki lo bay LIVE y e ora comunidad di Aruba lo haya e oportunidad di rating, score e servicio cu e dokter di cas ta brinda. Na mas di un ocasion, dokternan di cas no ta di acuerdo cu esaki. Pero e minister ta haya cu esaki ta un manera cu e ta un sistema pa nan mehora nan servicio cu nan ta brinda na comunidad.
Den liñanan grandi, ta haciendo tur loke ta na nan alcance pa trata di mehora e servicio cual ta e meta final di e gobierno aki. P’esey a pone den e programa di gobernacion, y p’esey su persona como minister di Salubridad, ta bringa pa logra e meta aki pa cumpli cu e demanda cu tin den e comunidad, pa brinda un miho servicio cu tin na e momentonan aki.
E minister a sigui bisa cu nan a acerca EPI caba pa bin cu’n curriculum pa brinda e studiantenan cu tin interes pa bira un verpleger, cu na Aruba mes tin e oportunidad. Tambe nan ta bezig cu UNiversidad di Aruba hunto cu Minister di Enseñansa, cu si despues di e MBO pro sigui cu specialisacion ariba HBO niveau. Di nan banda, gobierno ta haciendo e ehercicio necesario pa wak si localmente haya interes di parti di nos hendenan, pa traha e tipo di trabaonan aki. E no ta trabao cu ta haya hende facil.
E no ta facil, ya cu mester tin amor, pasenshi y banda di esaki, mester traha warda. Pero e ta un reto pa haya e tipo di hendenan aki. Pero cu’n campaña di conscientisacion, brinda informacion di kico ta e tareanan cu mester haci y e beneficionan, mester por logra haya hende local, mirando cu a habri e curriculum na EPI pa e studiante por haci, localmente, e tipo di proyectonan aki. Te asina leu, minister di Salud, Sr. Dangui Oduber.