CARACAS, Venezuela- Despues di e detencion di un total di 11 miembro di e hunta di directiva di e banco Venezolano, Banesco, gobierno a anuncia cu e lo interveni den e banco Banesco pa un lapso di 90 dia.
Segun gobierno, esaki ta pa “limpia” Banesco di cualkier operacion ilegal. Banesco su operacionnan lo sigui ‘normal’. Fiscal general, Tarek William Saab, a informa diahuebs mainta cu e hunta directiva di e entidad bancario aki lo por ta vincula cu iregularidadnan cambiario cu lo ta un menasa contra di e moneda Venezolano.
E detenidonan ta:
• E presidente ehecutivo: Oscar Doval.
• E vice presidentenan: Jesús Irausquin, Carlos Lorenzo, Pedro Pernía y Belinda Omaña.
• E consultor huridico: Marco Ortega
• E directora: Liz Sánchez.
• E gerentenan:David Romero y Cosme Betancourt.
• E compliance officer: Teresa De Prisco y Carmen Lorenzo.
Aunke cu na Venezuela ta existi control cambiario desde 2003, ta existi un cotisacion ilegal di dollar, hopi mas halto cu e cotisacion oficial. Esaki ta wordo uza pa fiha prijs di articulonan di prome necesidad y servicio, cu ta wordo maneha a trabes di rednan di operadornan cambiario.
E titular di Ministerio Publico a referi cu como part di e “Operación Man di Papel”, e operativo policial “mas grandi di historia” di e pais Suramericano pa frustra rednan di traficantenan di placa di papel y cambionan ilegal, a detecta “actividadnan sospechoso” den e movimentonan financiero di Banesco.
Den e investigacion a bin determina cu 90% di e cuentanan asocia na “actividadnan destabilisador contra di e area socio economico” ta pertenece na e entidad bancario ey.
Durante e investigacionnan a haya reportenan di actividadnan, clientenan cu a haci transaccionnan desde IP adresnan ubica pafo di Venezuela, e.o.
Despues di un inspeccion haci pa e Unidad Nacional di Inteligencia Financiero, segun e fiscal general, a detecta varios omisionnan den e prevencion y monitoreo di actividadnan cu por ta relaciona cu legimitacion di capital.
“Esaki ta un operación cu a logra habri un sistema financiero paralelo for di otro”, según William Saab.