CARACAS/MADRID- E minister di Relacionnan Exterior di Spaña, Josep Borrell, diabierna a afirma cu gobierno Spaño lo “limita” e actividadann politico di e lider di oposicion Venezolano, Leopoldo Lopez. Actualmente Lopez ta den e residencia di e embahador di Spaña na Venezuela.
“Spaña lo no permiti cu su embahada comberti su mes den un centro di activismo politico”, Borrell a bisa periodistanan na Libano, unda e ta di bishita oficial.
Diahuebs Lopez tabata tin un encuentro cu prensa den e embahada y a recorda cu “desde awo esaki lo wordo regula”.
E minister a agrega cu, respetando derechonan internacional, e figura di “bishitante of asiliado” den e embada “naturalmente” ta implica un limitacion den su actividad politico.
“Nos tin tur confiansa di cu, den e condicionnan aki, Venezuela naturalmente lo mester respeta e inmunidad di e teritorio di e embahada di Spaña”, el a agrega.
Borrell a reitera cu Spaña “lo no entrega” Lopez na autoridadnan Venezolano, a pesar di cu e Tribunal Supremo Venezolano diahuebs a dicta un orden di detencion contra di Lopez. Di mes manera, el a recorda di cu Lopez ta den e sede diplomatico den calidad di “bishitante” y no por pidi asilo politico, ya cu ley Spaño lo no permiti’e haci esaki desde teritorio Spaño.