Pa 2018 ta dificil pa haci cambionan, ya cu e presupuesto lo mester tabata cla caba, prome cu dia 15 di December, 2017, pa cual Minister di Finanza, Sra. mr. Xiomara Ruiz- Maduro ta splica.
Esaki ta algo cu gobierno ta trahando ariba dje, y lo mester bay mas tambe ariba locual ta existente, manera p..e BBO, BAZV y tur eseynan. Facil ta pa bisa, cu lo bay hisa un belasting of ta bay bin cu belasting nobo y ta resolve e problema. Pero e operacion ta bay bon, pero e pashent (pueblo di Aruba) ta muri.
Pa loke ta 2018, e lo ta un aña caminda cu ta bay pone e plan bon den otro pero tambe ta traha ariba loke for di hopi tempo caba ariba e base di restructura e sistema di belasting. Tin cosnan cu bo por haci sin cu mester bay na e pueblo y cosnan cu bo por haci un, cu leynan, pero tambe cu control cu e leynan. Como ehempel, Sra. Ruiz- Maduro a bisa cu tin hopi compania cu ta cumpli cu belasting, pero tambe tin hopi compania ilegal cu no ta paga belasting. E ta un competencia inhusto pa esunnan cu si ta haci’e. E hendenan aki mester wordo cobra manera e mester ta. Ta elimina e parti e ilegalidad, e concurencia inhusto. E ora lo por traha mas eficiente pa yega na e placa cu mester. Esey ta djis un parti.
Banda di dje tambe lo mester tin un revision di e belasting, unda cu kier bay den e indirecto, sin cu ta baha ariba e grupo chikito cu ta traha solamente. E presion t’ey pa bin cu cambionan, ya cu Aruba ta bou di supervision. Tin hopi trabao pa tuma luga den un periodo masha chikito pa cual e ta pidi un tiki pasenshi. Sra. Ruiz- Maduro a bisa cu gobierno no kier djis yega hisa benta algo anto despues lo mira con pueblo ta survive. Esey no ta e idea.
Pa 2019 en adelante, Aruba lo conoce algun cambio y e cambio aki ta pa nos mesun bon. Si no haci e cambionan aki, lo no tin futuro pa nos mes corda pa nos yiunan. Cambionan tin cu wordo haci. Lamentablemente 8 aña a pone un presion grandi, cual ta un debe grandi ariba nos cabes. Y ainda falta, manera cu e gobierno anterior tabata bisa. Y ainda falta e proyectonan PPP pa finalisa cu ta costa un capital di placa.
Lo tin cu busca un operacion cu na final e pashent ta keda na bida, no cu ta mata e pashent. No ta tur hende tin’e ruim, pa cual mester wak bon kico ta bay implementa. P’esey e minister ta dedica hopi tempo pa e pueblo compronde kico ta e realidad. Gobierno a trece e realidad di e situacion di nos pais dilanti. Ora cu solamente bo sa kico ta bo realidad, e ora nos lo sali bay dilanti. E ora tambe ta haya hende cu ta willing pa hunto logra algo.
Ta p’esey a bay New York, pa papia cu e instancianan y nan a compronde, cu bin cu solucion cu por surti Aruba na miho manera. No ta bay Den Haag pa busca niun problema, gobierno no tin pensa niun rato pa bay dilanti Kabinet di Gouverneur, bou palo pa gaña muri.
E gobierno aki no a causa e desaster aki, nan a hereda e desaster. Awo ta bay traha un plan con ta bay sali for di e situacion aki. Den esey nan kier pa hende compronde kico nan ta haci y pakico ta bay haci’e. Te asina leu, declaracionnan di Sra. mr. Xiomara Ruiz- Maduro, Minister di Finanza