Sindicatonan Uni a tuma nota di e sucedido cu lider di sindicato SADA. Sr. Rene Bernabela ta amplia ariba e esaki.
Sindicatonan ta focus ariba e futuro, pa loke ta desaroyo di sindicalismo aki na Aruba y e comportacion pa cu gobierno pa locual e trabao cu’n presidente di sindicato ta hibando y tin u hiba na aruba. E parti aki ta e parti importante. No mester lubida cu tin tratadonan internacional di ILO, cu ta proteha e sindicatonan cu ta eherce na pia di trabao.
Hopi biaha ora cu e presidente di sindicato bin dilanti y vocifera riba cualkier sucedido, e ta expresa esaki na nomber di su miembronan. Den e caso aki, segun sr. Bernabela, no ta importa e asignatura di gobierno, pero e tratado di ILO ta proteha e sindicato ey, ya cu su presidente na e momento ey tin e pechi bisti como presidente di sindicato. Su trabao e ora ey ta ‘un signalerings functie’, unda cu e mester trece e preocupacionnan na atencion di e publico en general.
Esaki ta e rol cu tur e sindicatonan ta para pe y ta manda bisa gobierno pa tene cuidado pa trata di trapa ariba derecho di sindicatonan na Aruba, ya cu sindicatonan no lo permiti esaki. No ta cuestion di sinta ariba stoel di niun persona, pero loke hefenan di departamento mester compronde cu sindicato nan presidente tin un trabao pa haci y cualkier inkietud manifestando, na interes di pueblo en general, na tin tur derecho di trece esaki na atencion di pueblo, di kico ta pasando. Cada presidente di sindicato sa e parti caminda cu e no mag di crusa e liña, pa locual ta secreto di trabao. Tambe cada presidente sa tocante secreto di trabao, pero e purba di cera boca di un sindicato, pa e no trece su preocupacion, esey no lo wordo permiti pa niun gobierno bay trapa ariba derecho di niun sindicato, su lider y su miembronan.
For di 8 aña pasa TOPA tabata boga pa e parti di e GEOA. No tin un vehiculo cu e parti GEOA cu ta ancra den ley, locual ta articulo 101 di LMA, unda tur preocupacion, inkietud, esey ta e articulo pa atende cun’e na mesa pa tur problema. Na Corsou, esaki ta wordo aplica y practica sin problema. Pero na Aruba, e parti di unidad sindical, hopi ta e sindicato cu a laga gobierno infiltra den nan organisacion, ta haci cu awe e GEOA no ta funciona. Pero Sr. Bernabela a manda un consheo caba pa e otro sindicatonan, specialmente pa e presidente di sindicato di Aduana, cu mester renoba e GEOA cu ta e articulo corecto pa atende cu e problemanan na pia di trabao. E dia di mañan lo haya un otro gobierno cu kier bin cu ideanan straño y otro dialogonan social, cu no mester sinta hunto cu otro sindicatonan di sector, ta tuma decision descabeya pa e empleadonan publico, cu consecuencianan fatal, no solamente pa e empleado publico pero pa e empleado en general.
TOPA ta para ariba cu e GEAO mester funciona debidamente, pasobra cu GEOA ta un ley. E ta ancra den e LMA. Y tanto gobierno como sindicato mester sinta hunto y yega na un dialogo pa soluciona e problemanan existente. E GEOA ta conta pa Aruba tambe, ya cu manera cu e ta na Corsou e no ta diferente cu di Aruba ya cu e ta un ley Hulandes y den e caso aki no tin miho solucion cu GEOA. E ta concerni tur empleado publico y tur aspecto cu ta regarda e empleado publico. P’esey e sugerencia di TOPA pa yuda sindicatonan pa reactiva e GEOA aki, mas lihe cu ta posibel. Te asina leu, Sr. Rene Bernabela, di sindicato TOPA.