Gobierno mester bin cu’n plan unda e ta mustra cu e ta bay inverti tanto den cierto sectornan, e ta bay crea cierto cuponan di trabao. E tin cu mustra un plan cu ta bay tin crecemento economico, pa paga e debenan. Mester mustra cu ta bay crece pa asina e pueblo haya un alivio despues. Sr. mr. Ady Thijsen, presidente di Parlamento ta amplia.
E crisisheffing ta temporal pero mester bin cu algo na luga di e crisisheffing. Mester busca manera pa tin un crecemento economico, pa e parti unda e pueblo ta bay mantene e poder di compra tambe. E pueblo aworaki ta bay contribui cu e crisisheffing. Pero no por keda ariba esey so. Mester bin cu’n plan economico pa mustra cu bo ta bezig ta crea mas cupo di trabao, mas entrada pa Aruba, pa atrae inversionistanan pa Aruba. Esey ta duna e parti unda cu mester gui’e pa bay eynan. No ta asina cu gobierno ta bin cu heffing/medida y e pueblo ta keda bay atras.
PILAR ECONOMICO
Aruba su unico pilar economico ta turismo, mientras cu ta sperando ariba e refineria, cual e minister encarga mes a bisa cu no por haci nada cu contract te cu 2020. P’esey ta bisa cu e plan economico mester bin mas pronto posibel. Mester tene cuenta cu loke ta wordo acorda cu Hulanda. Esey ta loke nan ta bezig cun’e. Kico ta bay paga a base di e financiamento. Si logra yega na un consenso cu Hulanda, cual Sr. Thijsen ta positivo ariba esaki, lo bay paga un interes mucho mas abao. Aruba su turismo ta bayendo bon, pero e por wordo diversifica. Pa loke ta e refineria, tin e problema huridico/legal cu si ta kibra e contract si of no. E ta un problema dificil, ya cu e contract ta wordo traha di un manera cu no por wordo kibra prome cu 2020. Pero segun mr. Thijsen ta bisa cu semper mester tene cuenta, hasta cu si tin cosnan por escrito ora di contract traha, semper circunstancianan rond di dje ta hunga un rol grandi. Semper bo por haya bo cu bo por kibr’e of e otro partido por kibr’e. Pero mester tene cuenta cu e ta habri hopi cupo di trabao. Si e ta un alternativa, mester wak si e ta un alternativa bon pa Aruba. Mester keda watch it. No keda concentra ariba esey so. P’esey ta warda ariba gobierno su plan economico, pa stimula economia di Aruba, unda ta papia di empresarionan chikito y mediano, cu’n plan di desaroyo. Pero mester cuminsa move ariba dje, no keda bisa so, pero haci tambe. Y nan ta kere hopi den e parti di agricultura, cria y pesca cu tambe ta un parti cu ta yuda hopi. Paso e por importa menos, esey ta yuda pa crea mas entrada, prijsnan, etc.
E punto mas cardinal ta gobierno mester presenta su plan economico. Cu unda e ta mustra con e ta bay crece e economia di e pais aki y asina hunto cu loke e convenio pa paga e debenan, pa asina por yega na algo cu ta crece nos ta crece, mas cupo di trabao. Asina lo keda bay dilanti. Esey ta esencial.
PRESUPUESTO
Ora cu presupuesto 2019 wordo trata lo bay tin debatenan interesante y pueblo lo wak puntonan importante den ki direccion gobierno kier bay. Pero parlamento lo keda controla skerpi y si mester bin cu amienda pa haci cambio pa miho pa pueblo, nan lo haci esaki. Si tin cierto puntonan cu parlamento ta wak cu no ta cumbini e pueblo, cu ta wak cu e pueblo ta bay atras, tambe nan por bin cu amienda pa cambia esaki. E presupuesto di 2019 lo bay ta esencial pa futuro di e pais aki, segun Sr. mr. Ady Thijsen, presidente di Parlamento di Aruba.