Mirando cu ta Prome Minister mr. Mike Eman a bisa den e debate politico di lo bay cera e dump na Parkietenbos, a acerca su persona. Sr. Mike Eman ta splica.
Un tema cu gobierno ta trahando hopi duro ariba dje, ta cu e comprension pa esunnan cu ta biba den Mahuma, tur e area di Parkietenbos y Simeon Antonio y ta un situacion hopi fastioso. Desde cu gobierno a inicia e proceso, uno pa haya e posibilidad pa tuma tur e sushi ey y converti esaki den un producto di reciclahe, gobierno a cuminsa e proceso hunto cu Ecotech, pa tuma tur e sushi, clasifica esaki pa WEB por uz’e.
E proyecto aki a conoce cierto retonan y pesey e momento cu a pone pa por a cera dump, ta trahando ariba dje pa por alcansa esaki. E compromiso di gobierno ta total, y esaki e ta enfatiza. Segun Prome Minister, den e debate el a skucha nan ta bisa cu ya, hopi aña a pasa. Pero hecho ta, cu e gobierno aki a bin haya cosnan cu ta existi 30 pa 40 aña caba y a hacinan. Pa 40 aña largo a papia di hospital y nan a haci’e. Pa 40 aña largo nan a papia di vierbaansweg, pero e gobierno aki a haci’e. Pueblo di gobierno ta un gobierno di asignatura, di liderasgo pa haci cosnan cu tabata parce imposibel, posibel y esey ta cera dump tambe.
E opcion ora di cera dump, ta cu lo recicla e sushi den un producto cu por wordo uza, cu no ta bay just crea un otro dump, pero ta converti’e den un producto di reciclahe cu ta bira parti tambe di e vision berde di nos pais. Ariba esey gobierno ta concentra y esey ta algo, cu e retonan cu tabata tin cu Ecotech cu a conoce cierto cambionan, di e momento cu por a realisa esaki.
Cuanto esaki lo costa pais Aruba? Segun Prome Minsiter , un parti ta bin di sector priva, un parti di gobierno y un parti di Serlimar. E costo total ta pendiente ainda, pero mescos cu a realisa e vierbaansweg, traha un hospital, introduci un pensioen general, pero cu un tiki pasenshi esaki tambe lo wordo realisa.
Segun Prome Minister, mr. Mike Eman, esaki lo wordo realisa e aña aki ainda. E fecha exacto no ta conoci, pero si Prome Minister a enfatiza cu esaki lo sosode e aña aki ainda.