Ariba e dia informativo organisa pa Departamento di Recurso Humano di gobierno, Minister Angel Bermudes a duna un presentacion, y e ta splica unda gobierno kier yega pero tin hopi pa haci pa drecha e parti personal di gobierno y pesey mester cuminsa cu integridad.
Cu regularidad Departamento di Recurso Humano ta organisa e cursonan aki, muy en particular pa e hefenan di departamento, y ehecutivonan cu gobierno tin den servicio. Y durante un parti di dia, nan ta labora ariba un cierto topico. E biaha aki tabata tin e topico di Integridad y Minister Bermudes tambe a un discurso ariba e topico aki, prome cu el a sali pa bay Staten pa un reunion publico.
Integridad ta un actitud humano, cu ta mes bieu cu humanidad. For di tempo cu hende ta existi, ta existi e aspecto di humanidad. Si lesa historia bon, den pasado tabata tin hopi guerra, hopi crimen pasional, etc. Tur tabata a base cu integridad tabata den wega. Cu otro palabra, tabata tin hende of personahe cu no tabata confiabel. Esey no a cambia. Ta keda e aspecto di caracter di hende, y Minister Bermudes ta di opinion cu eynan mester pone atencion tambe, y den gobierno tambe mester tin un alta integridad. Esey kiermen, cu e trahadonan di gobierno, e ambtenaarnan mester ta confiabel pa e clientenan y gobierno tambe mester por confia nan, cu nan ta haci nan trabao debidamente.