Guyana ta lidera e agenda ambicioso di siguridad alimentario di e Comunidad di Caribe (CARICOM), pero e pais kier añadi Aruba n’e lista di pais na cual e kier suministra alimento y posiblemente na otro pais.
Esaki ta segun presidente dr. Irfaan Ali, kende a duna un discurso n’e ceremonia dje instalacion nobo di GAICO na Nismes, West Bank Demerara (WBD) diasabra ultimo.
Den un articulo publica riba e portal di noticia Guyanes, Newsroom, e hefe di estado a bisa cu su gobierno kier p’e economia local ta bon diversifica. P’esey, e ta invertiendo fuertemente den e sectornan no petrolero pa garantisa su competitividad.
Y e sector agricola, el a bisa, ta gosa di gran parti di e atencion di gobierno.
Unabes cu Guyana por satisface comodamente su demandanan di alimento y esun di CARICOM, e pais kier exporta mas di su alimentonan na otro pais.
“Nos ta negoshando un MoU cu Aruba riba con Guyana lo ta e centro di suministro di alimento pa Aruba.
“Unabes cu esaki tin exito, nos por bay otro pais,” presidente Ali a anuncia diasabra.
Aruba, dr. Ali a splice, ta importa mayor parti di su alimentonan. P’esey e gobierno ta kere cu lo ta un bon mercado p’e productonan di Guyana.
Net un dia prome, mientras cu e presidente tabata dirigi n’e residentenan di Coverden, East Bank Demarara (EBD), el a insinua cu e gobierno ta considerando un servicio di ferry entre Guyana y Aruba.
Guyana ta lidera actualmente e obhetivo ambicioso di CARICOM “25 pa 2025”, cu ta consist cu e paisnan di CARICOM reduci su importacionnan costoso extraregional di alimento den un 25% pa 2025. E obhetivo aki mester alcansa, door di aumenta e produccion y comercio di alimento dentro di e region.