Willemstad: Kòrsou i Hulanda a yega na un entendementu pa loke ta trata e Akuerdo di Kresementu. Firmamentu di e Akuerdo di Kresementu akí ta duna un impulso na ehekushon di e Strategia di Kresementu ku Gobièrnu di Kòrsou, riba propio inisiativa, a bin ta traha riba dje último tempu.
E Akuerdo di Kresementu ta duna espasio finansiero adishonal den e próksimo añanan pa trese kambionan struktural, pero tambe prinsipalmente pa por hasi e invershonnan nesesario den ekonomia i desaroyo sosial. Awor tin un apertura pa traha riba un pakete di invershon krusial riba área ekonómiko i sosial na bienestar di rekuperashon. Mientrastantu ta tuma e akshonnan nesesario segun un trayektorio muchu mas realístiko pa introdusí ahustenan finansiero, ekonómiko, gubernamental i un agènda sosial segun e aserkamentu integral ku Gobièrnu tin na bista. E Akuerdo di Kresementu ta stipulá palabrashonnan di mas aña riba tur e terenonan akí, ku lo ser kuidá pa un komishon di progreso miksto ku lo raportá periódikamente na partidonan enbolbí.
Instrukshon
Banda di a yega na un akuerdo konforme deseo di Gobièrnu di Kòrsou, Konseho di Minister di Reino a disidí di duna un instrukshon basá riba loke e lei di supervishon finansiero di Reino (lesa Rft) ta preskribí. Gobièrnu di Kòrsou a tuma nota di e instrukshon, pero alabes ta keda enfoká riba su propio kompromiso pa atendé ku retonan finansiero i ekonómiko manera stipulá den e akuerdo di Kresementu. Hustamente pa e motibu akí Gobièrnu di Kòrsou no ta mira e nesesidat di un instrukshon i lo entregá un opheshon (bezwaar) serka Konseho di Estado di Reino (Raad van State).
For di inisio Gobièrnu di Kòrsou a boga i negoshá – lòs for di e parti di instrukshon – intensivamente ku Gobièrnu di Hulanda i ta satisfecho ku a logra pa haña e espasio deseá pa hasi ahustenan gradualmente. Esaki miéntras por ehekutá un programa di invershon sosial-ekonómiko kanando un kaminda realístiko i responsabel. Hulanda di su banda lo duna e sosten nesesario segun palabrashonnan hasí (por ehèmpel fasilitashon di fondonan di insentiva).
Gobièrnu di Kòrsou lo sigui tene komunidat na altura di tur desaroyo pa loke ta trata kontinuashon di ehekushon di e Strategia di Kresementu ankrá awor den un akuerdo.