BOGOTA, Colombia – E Ombudsman, Carlos Alfonso Negret y e minister di Husticia di Colombia, Jorge Londoño, a condena dialuna morto di un mucha muhe di shete aña cu a wordo rapta den un bario popular di Bogota y despues a aparece morto den un cas exclusivo di e capital.
“Ta un caso manera cualkier cu ta pone bo curason bira chikito, e ta conmovebo y ta den man obviamente di autoridadnan hudicial cu tin cu encarga di investiga di e crimen horibel aki,” Londoño a declara na prensa local.
Di su parti e Ombudsman a subraya e compromiso di e entidad aki na defensa y promocion di derechonan di mucha y di hende muhe, cual derechonan humano ta “un prioridad.”
Di e manera aki, Defensoria a señala cu nan lo realisa un siguimento na e investigacion cu ta tumando luga pa establece e responsabilidad di esun cu a ocasiona e morto di e mucha muhe y presunto acto di violencia sexual di cual e tabata victima.
E Instituto di Medicina Legal di Colombia ta investiga ademas si e mucha muhe di shete aña a wordo viola prome cu el a muri, fuentenan di e institucion a informa.
E principal sospechoso ta un arkitecto di 38 aña, ya cu e curpa di e menor a wordo localisa den un propiedad di su famia caminda cu e tabata biba.
E homber ta den Clinica Navarra, caminda el a yega “bao di un crisis” y caminda e ta bao di custodia di autoridad.
E morto di e menor a conmove e habitantenan di Bogota, algun di cualnan a convoca concentracionnan ciudadano pa rechasa e hecho, e prome di awe merdia, dilanti di e Clinica caminda cu e sospechoso ta ubica y otro na Colegio Simon Rodriguez, caminda cu e chikito tabata studia.
Fuente: NTN24