Diamars mainta, den compania di tur Minister di Gabinete Wever-Croes, Minister Otmar Oduber a anuncia su retiro for di politica na December 2019. E motibonan cu Minister Otmar Oduber a duna ta personal, familiar y di salud. Prome Minister Evelyn Wever-Croes, despues cu Minister Oduber a anuncia su retiro, a dirigi palabranan na Minister Oduber gradiciendo e pa su trabounan y logronan durante e casi dos aña como Minister encarga cu Infrastructura y Medio Ambiente.
“Esaki no ta un momento facil ni un momento cu mi no a mira cu lo yega. Minister Otmar Oduber ya pa un tempo caba a comenta na mi den varios ocacion di su decision pa retira. Como politico, na momento cu drenta politica, bo ta tene cuenta cu lo yega un dia asina. Y hunto cu bo famia y sostenedornan, lo bo yega na e punto aki”.
Prome Minister a expresa cu no ta un secreto cu dos aña pasa, prome cu a asumi responsabiliad di gobernacion, e relacion cu Minister Otmar Oduber no por a wordo considera como amistad siendo cu nan tawata contricante politico. Sinembargo e deseo di comunidad pa cambio expresa den eleccion 2017 tawata un les pa tur e partidonan pone diferencianan un banda y enfoca riba loke ta importante pa e pais.
“Pa Minister Otmar tambe esaki ta un ehempel pasobra indudablemente p’e tampoco esaki tawata facil. Aunke cu diferencianan di opinion hopi biaha tey, nos no a enfoca riba loke ta dividi nos, sino riba e union pa logra traha hunto pa nos pueblo”, Prome Minister a duna di conoce.
Prome Minister a expresa: “Nos pais ta pasando den momentonan dificil di hopi tension y presion. Sinembargo ta hopi importante pa keda enfoca den loke ta uni nos enbes di loke por dividi nos. Naturalmente, nos Gobierno ta keda solido y hopi stabiel. Minister Otmar ainda ta cu nos pa algun luna pa despues nos yama bon bini na señora Marisol Lopez-Tromp cu lo continua cu e trabounan manera cu nos tin nan premira”.
Prome Minister Evelyn Wever-Croes a duna di conoce cu na varios ocacion Minister Otmar a comenta cu n’e di su decision pa retira di politica. Na principio Prome Minsiter a duna di conoce cu e no a tuma su comentario na serio. Pero despues a ripara cu e tawata tin’e den serio. Gobierno di Aruba, Gabinete Wever-Croes ta respeta e decision cu sin duda ta grandi y dificil.
“Nos ta gradici bo pa tur trabou cu bo a haci. Pa ta un motor tras di Gobierno cu sigur nos lo haya falta di dje. Como gobernante y persona, sigur nos lo haya falta di Minister Otmar. Esaki no ta momento di despedida ainda pasobra trabounan lo continua den e siguiente lunanan cu mesun amor y forsa”.
Prome Minister a cera su discurso enfatisando cu no tin problema den gobernacion cu a conduci na retiro di Minister Oduber. Pa cua motibo tambe, tur minister di Gabinete Wever-Croes a bin hunto y respalda Minister Oduber na momento cu e ta anuncia na pueblo di su decision pa retira como minister y como politico.
“Tin hopi presion di eyfo y hopi deseo pa e Gobierno aki no logra, pero mi noticia pa tur esnan cu ta haciendo todo por todo pa confundi pueblo cu Gobierno no ta logrando, ta cu nos ta logrando. Nos ta logra pasobra nos kier Aruba na prome luga”, Prome Minister Evelyn Wever-Croes a enfatisa.