Diabierna anochi, president di Venezuela, Nicolas Maduro a duna ordo pa cera fronteranan pa trafico aereo y maritimo entre Aruba cu Corsou y Venezuela pa 72 ora.
Prome Minister, Sra. Evelyn Wever – Croes, relaciona cu esaki a bisa di cu gobierno, cu hopi preocupacion a tuma nota di e medida aki, y el a bisa cu gobierno ta den evaluacion constante desde diabierna anochi cu Buitenlandse Zaken di Hulanda. Na mes momento, Sra. Wever- Croes ta den contacto cu su homologonan premier di Corsou, Sr. Ruggenaath pa nan ta riba un linea.
Atravez di e canalnan oficial di Reino, gobierno ta den contacto cu autoridadnan di Venezuela pa mira con por soluciona e situacion.
Na e momentonan aki tin Arubianonan na aeropuertonan na Venezuela cu no por bin Aruba pasobra e vuelonan directo pa Aruba y Curacao a wordo cancela. Vuelonan pa otro destinacion si ta sigui normal. Gobierno ta den evaluacion pa mira kiko por hasi.
Mas aleu, Sra. Wever- Croes a bisa di ta dirigiendo tur atencion caba na atende cu e problema di contrabanda, cu ta e motibo di e decision di presidente Maduro. Na e momento aki, gobierno di Evelyn Wever- Croes ta haciendo tur lo posibel pa combati e contrabanda cu tin. Manera Minister di Husticia a anuncia, entre otro lo intensifica control na nos costanan y cu e helicopter lo wordo treci bek, pa hasi Aruba mas sigur y pa combati actonan ilegal na nos costanan. Tambe nan a institui un comision special pa atende cu e tema di contrabando. Gobierno di Aruba lo sigi den dialogo cu Venezuela pa yega na un solucion di e situacion aki.
Aruba tin lasonan familiar, cultural y economico hopi estrecho cu Venezuela y p’esey e medida aki pa cera e frontera ta afecta Aruba hopi.