Gobierno di Aruba cu reunion positivo cu ehecutivonan di CAFT

Diabierna mainta Minister di Finansa, Asuntonan Economico y Cultura hunto cu Conseho di Minister tabata tin un reunion cu e Colegio di Supervision Financiero, CAFT den su constelacion nobo. Na promer lugar a yama bonbini na Sra. mr. Helen van der Wal como miembro pa Aruba y a cera conoci cu Sr. Henk Kamp como miembro nobo pa Hulanda. Durante e reunion a trata varios topico, entre nan, e Presupuesto Suppletorio pa 2018 y Presupuesto 2019.

Minister Ruiz-Maduro ta trece dilanti cu e reto financiero di Aruba ta uno grandi y no ta facil. Esaki ta exigi pensamento y accion continuo di parti gobierno y realidad ta cu nos no por kibra hero cu man y bira drecha di biaha tur locual no ta cana bon pa nos Pais durante e periodo di e gabinete anterior. Como gobierno nobo y cu un maneho serio, nos tin confiansa cu nos ta logra haya tempo, espacio y cooperacion pa por haci e trabaonan necesaro na bienestar di nos Pais y su generacion.

Pa e motibo aki CAFT di su banda ta reconoce e seriedad di gobierno den e forma di atende finansas publico di nos pais Aruba. Ademas e Colegio di Supervision a duna recomendacion con pa atende riba diferente tereno. Minister Ruiz-Maduro ta mira atras riba un bon reunion y e trabaonan ta continua pa pone finansa publico riba bon pia a termina largo y duradero cual ta brinda e confiansa di institucionnan pa nos gana credibilidad financiero bek di nos pais.

Comments

comments