LONDON, Inglatera – London lo noficia oficialmente dia 29 di Maart su salida di Union Europeo, e prome den 60 aña di historia di e bloke construi riba e shinishinan di Segunda Guera Mundial.
Reino Uni lo activa riba e dia aki Articulo 50 di e Tratado Europeo di Lisboa, mediante un carta di e prome minister Theresa may, na e presidente di e Conseho Europeo, Donald Tusk, e Gobierno a anuncia dialuna. Ademas, May lo dirigi na Parlamento.
Dia 23 di Juni di 2016, “e pueblo Britanico a tuma e decision historico di bandona Union Europeo. Diaranson proximo, e Gobierno lo duna curso na e decision aki y lo cuminsa formalmente e proceso” di salida, e minister a cargo di e Brexit, David Davis a bisa den un comunicado.
London y Brussel lo tin dos aña pa seya un acuerdo di divorcio cu ta spera cu lo aclarea, entre otro cosnan, si e Europeonan den Reino Uni por conserva e libertad di traha y residi den e pais, e factura cu London lo tin cu paga pa su compromisonan presupuestario te cu 2020 y un relacion comercial nobo.
Segun e comunicado Britanico, e embahador pa Union Europeo, Tim Barrow, a informa ya e presidente di e Conseho Europeo, Donald Tusk, di e fecha caminda cu e Gobierno lo invoca e articulo.
“Tur esaki ta cla di nos parti,” e vocero di e Comision Europeo, e ehecutivo comunitario, Margaritis Schinas, a responde. “Nos ta cla pa cuminsa cu e negociacionnan,” el a agrega.
Tras e activacion di e articulo, Tusk lo presenta “den 48 ora” un stuf cu liñanan grandi di negociacion, el a anuncia den un Tweet.
E 27nan mester aproba e liñanan aki den un cumbre extraordinario, cu lo por wordo celebra na principio di Mei. A continuacion, e Comision Europeo lo presenta su propuesta formal pa e inicio di e negociacionnan.
E negociacionnan por cuminsa formalmente entre seis y ocho siman despues di dia 29 di Maart, fuentenan Europeo a indica.
“Nos ta na drempel di e negociacion mas importante pa e pais aki den un generacion,” Davis a añadi.
“E Gobierno ta hopi cla den su obhetivonan: un bon acuerdo pa tur e otro nacion y regionnan di Reino Uni y pa Europa; un aliansa nobo, positivo entre Reino Uni y nos aliado y amigonan di Union Europeo,” e minister a sentencia.
Fuente: NTN24