Siman pasa CAFT tawata di bishita na Aruba na unda Parlamento tambe a reuni cu e organo di supervision financiero aki. Un di e puntonan cu Parlamentario Setty Christiaans-Yarzagaray ta trece dilanti pa informa pueblo di dj’e ta e echo cu ainda Parlamento no a aproba Jaarrekening 2016 y ta desea di splica tambe e motibonan principal di esaki.
E prome motibo pa cua Parlamento ta hopi cuateloso pa no lo core aproba mesora ta paso aña 2016 tawata e prome aña completo cu pais Aruba tawata bou supervision financiero di CAFT. Parlamento ta studiando cautelosamente tur loke a sosode den e aña aki cu ta un aña bou e gobierno anterior.
E di dos motibo ta cu a tuma nota di iregularidadnan den e cuenta annual di 2016 pa loke ta trata con a calcula e sector collectivo. Con a yega na e calculacion di sector collectivo ta importante mirando cu den e ley di LAFT ta indica con y ken ta stipula esaki y kico esaki mester ta pa cumpli cu e normanan menciona den e ley. Den e rapport di Algemene Rekenkamer, cu ta un di e institutonan cu Parlamento ta tuma nan puntonan di bista y analysis na serio, ta indica claramente cu e no por bisa si di berdad pais Aruba a cumpli cu e normanan di LAFT di aña 2016. Cu e informacion aki, Parlamento a haya necesario pa bay studia Jaarrekening 2016 mas den detaye na unda a constata algun iregularidad. No solamente pasobra a keda falta cuenta anual di algun instancianan, pero tambe paso ta indica claramente cu e resultado di sector collectivo ta contene informacion cu ta fout ademas.
Parlamentario Christiaans-Yarzagaray ta enfatisa cu p’e tambe ta trata mas tanto di 102 miyon florin di kwijtschelding cu pais Aruba a ricibi di e instituto di SVB. Esaki a wordo hinca den e calculacion di sector collectivo di 2016 pa laga mustra cu pais Aruba a yega na e normanan di LAFT pa e aña aki, siendo cu pais Aruba a ricibi e kwijtschelding aki for di januari di 2015. Mas ainda cu den e cuenta annual di e instituto aki si ekwijtschelding aki ta aparece den aña 2015.
E Parlamentario ta bisa cu como Fraccion di MEP, e no ta di acuerdo cu ora ta kwijtscheld un debe y ta pone un – (min) riba un debe pendiente mustrando asina cu ta cumpli cu norma di LAFT pero di otro banda, riba e cuenta di instituto SVB no añadi (+) un buraco financiero di 102 miyon extra di un placa cu nan no ta bay ricibi mas den e mesun aña (bookingsjaar).
Esaki a trece duda den nos Parlamentarionan, no solamente pa loke Algemene Rekenkamer a bisa cu e no sa si realmente Aruba a cumpli cu e normanan di LAFT, pero ademas di esaki, tin ehercicionan cu a wordo haci cu no ta conforme reglanan normal di administracion. “Pasobra no ta usual pa ehercisionan asina wordo haci pa mustra cu pais Aruba a cumpli cu norma. Tur gobierno mester wordo controla pero mas ainda un gobierno cu nan maneho no ta conta cu e sosten den e aña en cuestion pues mayoria den Parlamento lo yega y aproba Jaarrekening 2016 sin studi’e prome y busca conseho”, e Parlamentario a bisa.
Ora di aproba un cuenta annual, Parlamento ta aproba e relato financiero di pais Aruba pero tambe e maneho cu a ser hiba pa e gobierno den e aña ey. Por lo tanto, Parlamentario Christiaans-Yarzagaray ta bisa cu Parlamento, den todo caso Fraccion di MEP, ta buscando mas informacion como tambe conseho huridico prome. En especial pasobra ora aproba e cuenta annual, consecuentemente aproba e maneho cu e ser hiba den 2016, Parlamento ta duna un decharge tambe na e gobierno den e aña ey pa tur maniobra cu nan por a haci ademas. E Parlamentario no por duna un decharge zomaar si despues no por investiga of pone un minister cu por a haci maniobra robes para (personalmente) responsabel, cual a pasa caba den pasado!
Esaki, segun Parlamentario Christiaans-Yarzagaray ta trece un precion cu ne, pasobra pais Aruba mester cuminsa aproba Jaarrekening na tempo. Pero pa Fraccion di MEP ta importante pa haya clarificasion riba e iregularidadnan cu tin prome cu por aproba esaki den Parlamento. Ta hopi importante pa studi’e prome pasobra e chens ta cu Aruba no a cumpli cu normanan di LAFT ya desde aña 2016 caba.
“E halamento di cifra di un aña pa otro y di links pa rechts, pa mustra cu pais Aruba a cumpli cu normanan, no ta carga aprobacion di Fraccion di MEP. Ta bay tuma Parlamento un poco mas di tempo pa busca informacionnan adicional prome cu aproba Jaarrekening 2016 di pais Aruba”, Parlamentario Setty Christiaans-Yarzagaray a enfatisa.