A trata entre otro e tema di modernisacion di sistemanan di diseño y construccion
Minister di Asuntonan General conhuntamente cu Minister di Infrastructura y Medio Ambiente a reuni cu ADIAA cu ta e Asociacion di Ingenieronan y Architectonan di Aruba y Camara di Comercio (KvK), pa pasa riba diferente puntonan, ideanan, recomendacionnan y preocupacionnan di e dos gruponan aki.
Durante di e reunion diferente elemento sumamente interesante y importante pa nos Pais a wordo treci dilanti. Por ehempel e regulacion di architectonan y ingenieronan na Aruba como tambe e regulacion di e sector akinan. Un punto di enfoke di e grupo aki tabata e potencial inmenso di tin un sistema efectivo y eficiente pa locual ta trata e economia di Aruba. Considerando e realidad cu ta trata un Pais cu den grandura lo no crece mas, cual ta trece cu nos leynan y sistemanan di construccion y diseñonan mester por wordo adapta pa tempo moderno.
Mandatarionan presente a duna di conoce cu siguramente tabatin oido y comprension pa locual ta e puntonan treci dilanti. Y ta indica cu ya caba den reunionnan den pasado a tuma e puntonan aki den consideracion y a incorporanan den algun di e manehonan cu a wordo publica manera e ‘technisch beleid’ di DOW.
E reunion tabata fructifero y informativo y ta refleha e importancia pa Pais Aruba keda den contacto estrecho cu partnernan clave cu den e caso aki ta nos ingenieronan y KvK. Cu ta forma parti di e proceso aki pa salvaguardia e bienestar di e economia y conhuntamente colabora cu Pais Aruba riba esaki. A keda palabra cu lo keda haci e tipo di encuentronan aki pa asina intercambia informacion y informa di trabounan cu ta wordo haci.