Riba 26 di augustus ta haci exactamente 40 aña pasa, cu tres ruman a dicidi pa habri Giselle Department Store. Como muestra di aprecio pa e bunita trayectorio aki, Minister Xiomara Maduro a haci un bishita na Giselle pa asina felicita Staf y Personal, y tambe den nomber di Gobierno di Aruba entrega un reconocemento.
Giselle ta un bunita ehempel di un negoshi local funda na 1981 y maneha pa 3 ruman muhe Figaroa. Deta tabata e bendedora, Evelyna tabata e cahera y Elsie den feliz memoria tabata fungi como e manager. A base di nan trabou duro e 3 rumannan a logra establece un negoshi cu ta un ‘icono’ den nos comunidad di Aruba. Un Department Store cu ta hopi popular bou di nos localnan y tambe nos bishitantenan specialmente di nos islanan ruman Corsou y Boneiro. Hopi di nos conoce e frase ‘mi ta bay Giselle bin bek’.
Giselle Department Store a crece atravez di añanan y asina a contribui grandemente na economia di Aruba. Banda di trece paña y varios otro articulo na un prijs rasonabel pa nos pueblo, tambe a ofrece trabou na hopi famia. Remarcabel ta cu Giselle tin un personal cu ta consisti di localnan cu ta hopi fiel y leal cu tin varios aña ta traha na e negoshi aki.
Tin cu remarca e bon servicio di e personal cu ta hopi atento y amabel cu su clientela. Esaki ta duna e cliente un bunita experiencia y asina lo regresa pa nan siguiente compras.
E rumannan Greta, Evelyna y Elsie dfm ta un bon ehempel pa specialmente nos entrepeneurnan cu perserverancia, sacrificio, trabou duro y dedicacion bo ta logra cu bo negoshi ta exitoso. Minister Xiomara Maduro a reconoce tambe Sra. Gisella, kende tambe, despues di fayecimento di Sra. Elsie, ta forma parti di e Staf di Giselle. E mandatario ta recorda mama di Gisella, Sra. Elsie cu tabata un tempo colega di su señora Mama na un otro negoshi prome y despues Sra. Elsie hunto cu otro dos ruman a funda Giselle. Un persona cu e mandatario ta recorda cu hopi cariño.
Na nomber di Gobierno di Aruba y como Minister di Economia, Sra. Xiomara Maduro a gradici Famia Figaroa pa nan confiansa den Aruba su economia den tempo bon y menos bon. E mandatario ta gradici tambe pa e bunita aporte cu Giselle Department Store semper ta duna den forma di donacion na varios famia, instituto y organisacionan den nos comunidad.
Masha pabien na e famia grandi di Giselle Department Store.