Representante di Reino Hulandes cerca Unionnan Uni New York, señora Joke Brandt, e fin di siman aki ta cu bishita di trabao na Aruba. Como prome cita oficial, riba diahuebs 10 di februari 2022 el a bishita Gobernador di Aruba, Su Excelencia Alfonso Boekhoudt. E prome Secretario di Clima y Medio Ambiente, señor Kavish Bisseswar y e Representante Special di Asuntonan Exterior pa Aruba, Boneiro y Corsou, señor Roelof Buffinga, tambe ta forma parti di e delegacion. E audencia a tuma luga na Cas Ceremonial di Gobernador y e delegacion a wordo acompaña pa señora Jocelyne Croes y señora Ghislaine Nicolaas di Dienst Buitenlandse Betrekking. E bishita di trabao ta den cuadro di conocimento di e prioridadnan di Aruba relaciona cu temanan manera entre otro clima. Durante di e audiencia cerca Gobernador a papia tambe tocante e obstaculonan pa Small Island Development States (SIDS) manera Aruba, encuanto ricibimento di placa for di fondonan organisacionnan internacional.