Riba diamars mainta 5 di mei, Gobernador di Aruba, S.E. Alfonso Boekhoudt, a haci un bishita di trabou na Oficina pa Prevencion di Desaster (Bureau Rampenbestrijding – BRB). Gobernador a papia cu diferente miembro di e team y a informa su mes riba e coordinacion di crisis den cuadro di coronavirus (COVID-19).
Riba invitacion di e Oficina pa Prevencion di Desaster, Gobernador ademas a participa na un reunion di e Team Operacional (TO). TO ta un parti importante di e organisacion di crisis Arubano y ta responsabel pa ehecuta e maneho di crisis na un manera coordina. TO ta consisti di un team di ehecutivonan operacional y riba invitacion expertonan por join e team. A activa e organisacion di crisis na momento di e brote di coronavirus na Aruba. E organisacion di crisis ta flexibel, adaptabel y dinamico, loke ta haci cu gobierno por actua na un manera liher y eficaz, tanto na nivel di maneho, como operacional.
Pa medio di combersacionnan telefonico y, si ta posibel, bishitanan di trabou, Gobernador Boekhoudt ta informa su mes riba e consecuencianan di e brote di coronavirus y ta expresa su apoyo y gradecimento pa e esfuerso di hopi persona den e lucha contra e pandemia. Ta tuma e medidanan den consulta cu e organisacionnan involucra, pa asina e bishitanan di trabou por tuma luga na un manera sigur.