Riba diamars 14 di maart ultimo Su Excelencia Gobernador di Aruba, sr. J.A. (Alfonso) Boekhoudt a tene un bishita di cortesia na Camara di Comercio y Industria di Aruba (KvK). Su Excelencia a wordo ricibi door di Presidente, sr. Ernst Mohamed, e Directora, sra. Sonja Velthuizen y algun miembro di Directiva. Presidente y Directora a haci un recorido cu Gobernador den e edificio di KvK y a splica en breve kico ta e tareanan di cada departamento di KvK. Despues di e recorido a tene un reunion cu e Directiva den e Auditorium di KvK.
Durante e reunion a trece diferente puntonan dilanti cu ta di importancia pa e comercio di Aruba. Despues di a introduci tur e miembronan di Directiva, a elabora riba e iniciativanan di KvK pa 2017 pa mehora comercio na Aruba. KvK ta forma parti di diferente comision relata cu E-commerce, Caya Grandi, ROPv, Diversificacion di Economia y Financiamento di Empresario pa nombra algun. KvK a menciona tambe cu e tin atencion pa e empresario hoben cu mester guia y financiamento. E meta di KvK pa 2017 ta “Trece empresario, gobierno y comunidad hunto”. E aña aki KvK lo inverti den su website y tambe den su sistema di registro nobo. E sistema aki lo reemplasa esun actual, lo ta mas facil pa e cliente traha cune y lo brinda mas servicio cu e cliente ta desea. KvK kier sigui modernisa su servicionan via un registro di negoshi mas moderno y automatisa p.e. un cliente por pidi un extracto y ricibi esaki digital. Tur dia tin negoshi cu ta registra y cancela di e registro di negoshi. KvK ta colectando informacion pa por comprende e motibonan pakico un negoshi ta cera. Pa fin di aña KvK ta bay trece mas claridad den e motibonan di cancelacion di negoshi.
En conexion cu eleccion 2017 KvK lo organisa dos debate caminda e partidonan politico lo debati otro. E debate lo wordo transmiti en bibo via TeleAruba. E comunidad lo haya e oportunidad di conoce kico ta e ideologia di e partidonan participando den eleccion y kico nan ta ofrece. KvK a reuni cu algun partido pa intercambia idea y comparti kico ta e preocupacion y e solucion cu KvK ta sugeri pa nan inclui den nan programa di campaña.
Pa loke ta e situacion di comercio den Caya Grandi, KvK ta bay sinta cu diferente stakeholders pa asina purba mehora e situacion di Caya Grandi. KvK a indica cu lo bay duna mas atencion pa trece bida den Caya Grandi.
Un desaroyo cu sigur mester tene na bista ta e consumo online. Na Aruba no tin ainda un sistema di pago online. KvK a tene reunion cu comerciante local y tambe cu CBA encuanto esaki. Hunto a discuti e situacion y tambe propone ideanan pa e obstaculonan cu esaki ta trece cune. KvK lo kier mira den futuro un materia encuanto “entrepreneurship”. Scolnan por yuda den forma un base pa e hoben ta mas bon prepara pa por lanta y maneha su propio negoshi den futuro. Mirando cu e gastonan ta halto e ta alabes un recomendacion di KvK pa introduci incentivanan fiscal cu lo yuda alivia un empresario cu kier cuminsa un negoshi.
KvK ta mira e importancia den apunta diferente areanan rond Aruba como zona pa naturalesa caminda e empresario tambe por contribui na su mantencion. Alabes ta importante pa conscientisa e comunidad riba nan comportacion pa cu desperdicio di sushi.
Na final di e reunion extenso Gobernador a vocifera cu e la anticipa e reunion aki for di hopi tempo. Gobernador ta mira e importancia di e funcion cu KvK tin y ta spera cu pronto por tene un otro reunion. Gobernador ta desea KvK hopi exito y pa sigui informa encuanto e logronan y preocupacionnan di e empresario local cu tin impacto riba e economia di Aruba.