Diabierna, dia 22 di September ultimo, a tuma luga e eleccion pa Staten di Aruba.
Riba dia 27 di September, a resultadonan definitivo a wordo stipula pa e Hoofdstembureau. E resultadonan di e cantidad di asiento ta como lo siguiente: AVP 9, MEP 9, POR 2 y RED 1 asiento. E otro partidonan (RAIZ, PPA/UPP, CURPA, MAS) no a saca kiesdeler.
A base di e resultadonan aki, Su Excelencia Gobernador di Aruba, riba dia 23 di September, a ricibi e presidente di e Conseho Electoral, sr. mr. dr. G. Thode, caminda cu Gobernador a cuminsa cu e proceso di formacion pa un gabinete nobo.
Fase consultativo
Riba dialuna, dia 25, diamars 26 y diaranson, dia 27 di September, a tuma luga combersacionnan consultativo cu e presidente di Parlamento di Aruba, presidente di Raad van Advies, e prome minister demisionario (alabes lider di partido AVP), lidernan di e demas partidonan politico, e Presidente di Banco Central, directornan di APFA, AZV, SVB, DRH y Directie Financien, presidentenan di SER, ATIA y Camara di Comercio, Mediador di Gobierno y sr. Fredis Refunjol (ex Gobernador di Aruba). Gobernador di Aruba, sr. JA Boekhoudt, a conclui cu e consultanan diaranson, dia 27 di September, unda cu e prome fase di e proceso di formacion a yega su final.
Fase di informacion
E siguiente fase den e proceso ta otorgamento di un tarea di informacion na un informador. Contrario na un formador, e informador no tin e tarea pa forma un gabinete, pero ta haya e tarea pa sondea e posibilidadnan pa un gabinete. E meta di e tarea di informacion ta pa sondea por ehempel e compatibilidad di varios variante pa un formacion di un Gobierno nobo y/of eventual prioridad y temanan di maneho pa un Gobierno nobo, a base di e resultadonan di eleccion.
Nombracion informador Arie Swaen
Riba diahuebs, dia 28 di September, Gobernador, a base di consehonan treci dilanti durante e periodo di consulta, a hiba un combersacion cu mr. Jacobus Andries (Arie) Swaen y a haci e peticion pa e bira informador. Sr. Swaen a acepta e tarea di ta informador.
Riba diabierna, dia 29 di September, sr. Arie Swaen a acepta formalmente e tarea di informador for di Gobernador y a cuminsa cu su trabaonan. E informador lo wordo asisti pa un secretario. Mr. dr. Hellen A. van der Wal BA a wordo nombra den e caso aki como secretaria.
E informador lo ehecuta su trabao independientemente, cu miras riba e tarea di informador y lo tene Gobernador na haltura segun palabracion di e desaroyo di su trabao. E raportahe (final) di e tarea di informacion lo wordo entrega na Gobernador. Segun expectativa e prome raportahe lo wordo entrega na final di otro siman.
Tarea di informacion
Gobernador di Aruba a haci e peticion na e informador pa haci un sondeo pa e formacion di un gabinete cu e siguiente tarea:
A constata cu for di e rondanan consultativo, varios tema di prioridad a wordo treci padilanti cu ta di importancia, entre otro:
Garantisa finansas publico sostenibel y sano y e necesidad pa reduci debenan publico.
E aumento autonomo di e costonan social y cuido debi na embehecimento y aumento di malesanan cronico.
E pago di pensioen awo y den futuro.
Un sociedad viabel, sigur y sostenibel, basa riba standard y balor.
Fortalecimento di e organonan di supervision y control.
Eliminacion di “red tape” pa empresario y ciudadanonan.
Introduci y salvaguardia un Gobierno transparente y “good governance”.
Considerando cu Aruba, a corto plazo, lo mester tuma un serie di decision importante pa mantene su economia y un sociedad sostenibel, Gobernador a pidi e informador pa:
Investiga e posibilidadnan di desaroyo a corto plazo di un Gabinete stabil, basa riba un base lo mas amplio posibel den Staten di Aruba.
Ademas, haci un investigacion riba e conveniencia di un investigacion independiente di un of mas organisacion internacional internacional na e estado di e pais den e area financiero y di “good governance”, pa na final, evita cu escogencia y medidanan necesario wordo politica.