E di 36 aña parlamentario di país Aruba a inicia diamars, 14 di september cu discurso di Gobernador Alfonso Boekhoudt, hibando palabra cu e mensahe di Gobierno. Un mensahe cu a keda caracteriza pa e palabra pandemia.
Na inicio el a recorda e fecha di awe cu Nacionnan Uni a declara como Dia Internacional di Democracia. El a repasa con e pandemia a afecta maneho di e país. Inclusive e eleccionnan Parlamentario cu a pesar, di e medidanan, por a tuma luga. “Den e sala aki unda representacion di nos ciudadanonan ta materialisa su mes den cada un di boso – e 21 miembronan di Parlamento – ta unda democracia di nos pais ta manifesta su mes den su máximo forma. Aki den boso lo debati, tuma decision y eherce e poder legislativo confía na boso p’asina cumpli cu e mandato cu pueblo a duna, cargando e responsabilidad pa defende y proteha e principionan di nos Estado di Derecho democratico.”
A papia con e pandemia a traha riba e ciudadanonan y a trece mas comprension pa cu otro. “Tin lesnan cu nos no a caba di siña, entre otro, e echo cu nos mester traha riba confiansa mutuo como pueblo. No solamente pueblo mester tin confiansa den gobernacion, pero gobernación tambe mester tin confiansa den profesionalnan y miembronan di nos comunidad cu tin interes general na pecho, manera maestronan, esnan cu ta brinda cuido y esnan encarga cu orden publico. Na momento cu nan profesionalidad wordo cuestiona, nos ta atachando nos ordo legal democratico. Nos por tin diferencianan di opinion riba tur tereno. Pero un cos nos como Arubiano mester por confia den dje ta cu, irespecto ken ta na mando, semper e balansanan democratico cu pueblo kier cuida lo wordo restaura danki na e sistema democratico vigente den Reino cu ta aplicabel aki tambe y cu hopi otro pais den region ta anhela. P’esey institutonan ta sumamente importante tambe pa garantisa e balansanan democratico. Nos mester ta hopi cauteloso pa no mina esakinan, pasobra hustamente e institutonan aki y e ordo legal democratico cu nos ta biba aden ta mantene nos libertadnan y derechonan riba pia.”
Den e discurso tambe a papi acu Gobierno y Parlamento mester traha conhuntamente riba oportunidad- y posibilidadnan cu e pandemia ta ofrece. Esaki cu e meta pa fortifica pilarnan di democracia. “Gobierno tin e compromiso pa sigura implementacion di e proyectonan y iniciativanan pa aumenta transparencia y combati corrupcion y pa implementa un plan integral riba e maneho di integridad di acuerdo cu e miho practicanan den Reino.” Asina lo introduci y aplica na un forma activo e Sistema Nacional di Integridad di e organisacion Transparency International.
Despues Gobernador a bay riba maneho general di gobierno riba diferente tereno, manera economía, cu ta e sector mas importante pa país Aruba por bay dilanti. “Gobierno a mira un aumento di interes pa e sector di agricultura y e posibilidad di inovacion cu tecnologianan moderno contribuyendo asina na un desaroyo economico sostenibel. Ademas di esaki, mester haci uzo di e oportunidad pa diversifica e pilar economico principal di nos pais cu ta cuadra mas cu un turismo di calidad y sostenibel di acuerdo cu e principionan di un economia blauw.”
Pa por move e economía, Gobierno lo sigui cu e proceso di eliminacion di e burocracia innecesario cu ta causa frustracion y tardansa cerca e clientenan di departamentonan gubernamental. Den esaki transparencia ta esencial y e proyecto di egovernment lo continua na tur nivel di nos aparato gubernamental. Esaki ta e base pa un clima di inversion sano cu lo conduci tambe na mas cupo di trabao y mas oportunidad empresarial. Empleo ta e vinculo mas directo entre actividadnan economico di un pais y e aumento di e nivel di bida. P’esey ta asina importante pa inverti den e desaroyo di e recursonan humano y pa promove siguridad di empleo.