E noticia cu ta riba medio digital www.bloomberg.com tin e politico di fraccion di MEP, Glenbert Croes, basta preocupa. Esaki ta debi cu tipo di noticianan aki no ta positivo pa Aruba pa loke ta referi e refineria.
E ta splica cu e ta spera cu e noticia aki no ta berdad, pasobra si e ta berdad, e ta sumamente grave, unda cu tambe tin nomber y loke ta preocup’e, cu Refineria di Aruba su nomber ta hinca aden. Refineria di Aruba ta di pueblo di Aruba, no ta di Citgo. Citgo ta e operador.
Pero pueblo di Aruba ta doño di Citgo. E parlamentario a keda contento cu e reaccion di Refineria di Aruba NV, cual ta algo cu nan no lo permiti pasa y cu nan lo coopera hasta cu investigadonan na Merca, si dado momento tin cualkier investigacion cu lo kier wordo haci. E parlamentario ta haya cu ta sumamente grave cu nomber di Prome minister Mike Eman y nomber di minister Mike de Meza ta hinca aden, pasobra manera cu e noticia a sali ta cu nan ta parti di e conspiracion pa procesa crudo Sirio den nos refineria. Sa cu nos refineria no ta operando y purba bende cu Merca, unda cu ta viola sancionnan cu Merca tin poni riba Siria. Loke ta importante pa tur hende realisa, Merca ta nos prome partner economico como pais. Bao di ningun circunstancia, nos mag di pone e bon relacion cu Aruba tin cu Merca na peliger. E parlamentario ta considera cu si e noticia aki ta berdad, cu prome Mike Eman y Mike de Meza, tin cu compronde cu e refineria ta di Aruba y no ta di nan. Nan ta haci cu e refineria ta di nan y MEP, cu a lucha pa habri e refineria y para e desmantelacion di e refineria. MEP ta kere de un refineria pa Aruba, unda cu a lucha pa e beneficio ta pa e pais aki, nos economia, e trahadonan local, e contratistanan local, ora cu mira e noticianan aki sali, ta condena e noticianan, pasobra dado momento ta daña e bon nomber di Aruba, ta daña e bon proposito cu tur tin cu e proyecto di Aruba. Ta daña e posibilidadnan y perspectiva. Imagina cu un noticia asina ta mata e proyecto. Tur trahado local, henter pueblo cu ta speransa pa e refineria habri bek, pa e yuda pone San Nicolas y Aruba riba pia, ta mata e speransa di tur hende. Y Mike de Meza y Mike Eman y Citgo, no tin derecho pa mata e speransa di e pueblo aki, pasobra a lucha atrobe pa e refineria. E acuerdo cera ta pa e refineria opera door di Citgo. Pueblo di Aruba ta doño di dje. Crudo Venezolano, pisa lo wordo pisa pa nos refineria wordo upgraded pa asina wordo bendi pa Citgo na Merca. Ki Siria tin di haber cu e cos aki. Pa cual MEP ta condena e noticia aki. Ta condena e intento aki. Ta bisa cu si ta berdad e ta algo sumamente grave y Croes ta contento di a mira su colega, compañero y amigo Dangui Oduber, a duna un señal cu como Parlamento di Aruba mester actua y busca fondo tras di ki intencion Mike Eman y Mike de Meza tin den esaki.
Ta Bloomberg News, cu ta un di e cadenanan noticioso di mas renombre y Merca a pon’e. Y nan a bisa cu nan a tuma contacto cu Prome Minister Mike Eman pa su reaccion y nan no tabata disponibel pa uno. Si no ta berdad, sali bisa cu no ta berdad. Dicon nan a keda keto. Unda tin huma, tin candela. E daño cu e noticianan aki ta haci na Aruba, na nos pueblo, e daño cu e ta haci na e futuro di e refineria, ta gravisimo, segun Glenbert Croes.