Si kita 1 voto di e 11 sosten cu e amienda aki a haya y traha pa trece den un otro forma pa regista e parehanan di mes un sexo segun Glenbert Croes. E ta splica cu si kita un voto, esey ta nifica cu e amienda aki no ta conta cu mayoria mas. Esey no ta kita, cual e ta reitera, cu nos tin e obligacion si como pais di bay crea e base legal pa tur hende sea nan ta parehanan di mesun sexo of ta parehanan no casa, por bay regla nan biba legalmente cu otro. Nan derechonan tambe cu otro, pasobra realidad ta cu si laga e buraco huridico ey habri, bo por bay haya huesnan cu no ta comparti nos cultura, huesnan cu no ta comparti nos pensamento, huesnan cu no ta comparti nos custumbernan dicidi riba e tema aki, si laga e bashi huridico aki habri. Parlamento tin un deber di bay crea e base legal pero di un forma corecto consultando nos pueblo, educando nos pueblo, informando nos pueblo, previo na tuma decision pa bo por busca e base amplio di apoyo pa asina pueblo por carga e decision cu bo tuma den parlamento, segun Croes. Na final di dia, loke bo kier ta crea un convivencia den bo comunidad, hendenan di tur preferencia por biba den paz cu otro, por biba respetando otro su forma di bida. Pero realidad tambe bo mester puntra bo mes si nos tin e derecho pa touch un sacramento di matrimonio cu a existi pa siglos. Croes ta kere cu e contesta p’e, ta no.
Croes a sigui expresa cu awor aki un hende si e kier bay casa na Boneiro, e ta registra su matrimonio na Aruba. Kico ta e liña cora fundamental, Croes ta bisa. Si un dado momento loke na final di dia ta sinti cu nos pueblo no ta carga e decision cu lo tuma cu a tuma tratando di haci lo corecto, tratando di cera e bashi huridico pa huesnan no bin impone matrimonio di mesun sexo na Aruba, e reaccionnan cu a haya despues di pueblo, ta reaccionnan cu a biba cun’e despues y te awe despues di 2 luna y 20 dia, hopi di e coleganan por conta, pueblo tin un descontento cu e decision cu a tuma.
E deber di MEP ta, y no por tuma pueblo na malo, nan no a wordo preconsulta, preinforma, preconcientisa riba e tema aki. A purba di forsa e decision aki, purba impone e cos aki riba nos pueblo y ora cu di parti di MEP kier duna un contribucion constructivo den dje, y asumi e responsabilidad p’e, tres di e miembronan di fraccion a dicidi vota na fabor y a duna cara despues. Fuera di esey a wanta e sla y Gobierno mes a keda boca cera. Gobierno mes no kier a asumi e responsabilidad pa bay informa pueblo riba e embergadura y contenido di e decision y e necesidad di cera e bashi huridico pa bin cu un forma legal con hendenan por regla nan biba y nan derecho. E punto fundamental ta esey. Nos pueblo a wordo debidamente consulta, educa, informa prome cu e decision cu a tuma, e contesta ta no, a pensa cu por haci’e despues, pero door cu un dado momento e principio di un ambienta di consenso ta, cu ta a base di consenso, cu tur hende ta bay carg’e, pero ta MEP so a carg’e. A bay television, a bay radio y alabes a wanta e slanan tambe di e reaccion, di desaprobacion di descontento cu a haya den pueblo, segun Croes.
Ta di lamenta cu colega Desiree de Sousa-Croes a manda un mensahe pa Croes bisa cu e ta un cobarde pa cual e ta contesta cu e no ta trata aki di cobardia.
El a splica cu un hende a pone un post cu Desiree de Sousa-Croes a referi na dje cu e ta un cobarde. Croes a splica cu cobarde ta ora cu bo tin guts pa coregi algo, un decision cu sa cu mester wordo coregi. Cobarde ta ora cu b’a tuma un decision y e decision na final di dia no ta wordo carga pa pueblo y bo no tin e curashi pa bay corigi’e. Esey ta cobarde. Y cu tur humildad, Croes a demostra cu e curashi pa coregi. Croes ta mira su coleganan den fraccion hopi di nan a tene consideracion cu e postura cu e tabata tin den fraccion durante e dianan di debate. Hopi di nan ta esnan cu tabata tin consideracion cu su postura. Por lo cual e ta sinti su mes prome yama pa fiha un postura riba e tema aki. Su recomendacion na fraccion di MEP, pa en block vota contra e invoeringsverordening, pa trank’e. Pero e realidad tambe ta cu si tabata tin 11 voto pa e amienda aki y Croes ta tuma e decision cu e no ta sostene e codigo civil pa e amienda di consenso manera awor e ta ancra, e ora dado momento sin 11 kita 1, esey kiermen cu no tin mayoria pa e ley. Loke mester haci e ora, ta cu si Gobierno dicidi si manda e invoeringsverordening pa debate den parlamento. E por ta positivo, e por ta negativo. E por ta negativo si Parlamento no ta habri pa tende e inkietudnan expresa ultimo dos luna y 20 dianan aki. Pero e por ta positivo tambe. E por ta positivo si dado momento si dicidi como Parlamentarionan di Pueblo pa bay cuminsa informa y educa nos pueblo pa si dado momento kier haci uzo di e oportunidad pa brinda e framework legal nobo pa regla e biba pa parehanan di mesun sexo y otro parehanan cu no kier casa, regla nan biba cu otro. Croes ta kere cu nos como pais tin e obligacion di brinda nan un forma legal pa nan por regla nan biba, sin duda, mester haci’e, pero mester bay haci’e den un forma unda cu lo no por crea e mas minimo impresion cu loke kier haci ta, duna nan un base legal pa regla nan biba, pero den ningun forma kier crea e impresion cu lamentablemente e geregistreerd partnerschap ta crea un fase transitorio pa finalmente yega na matrimonio di mesun sexo.