Informacion cu GKMB tin pa comunidad ta toch un tiki preocupante. Na fin di aña caba a ripara cu, door cu awa a cuminsa yobe, por a ripara cu e criaderonan a cuminsa subi. Sr. Luis Cheung, director interino di GKMB ta amplia.
Ora tin hopi criadero, esaki ta preocupante, ya cu esaki por leid na un outbreak. Hopi cas cu GKMB ta bishitando for di December ta, cu e criaderonan na e casnan ta subiendo. Dus hopi cas cu hopi criadero y p’esey GKMB kier manda un notificacion pa e comunidad pa por fabor, cana rond di e casnan, wak den cura si tin cosnan cu ta gara awa cu bo no sa di dje. Tambe un invitacion na e personanan cu ta explicitamente ta coy awa pa muha mata. Por a ripara cu tin un problema grandi cu e personanan aki. Hopi di nan ta laga e barinan, hemchinan habri y den tres dia cu awa a yobe, caba por tin larva di sangura ta landa. Den shete dia cu awa a caba di yobe, por tin sangura caba na cas.
Un yamado na personanan cu ta coy awa, pa please, si bo tin cu haci esaki, tapa e barinan cu’n sefta of un paña, pa e sanguranan no drenta. Of ponenan un caminda cu, en verdad sangura no por yega. Pero esaki ta mas dificil. E ta pafo. Tapanan cu’n sefta, tapanan cu’n paña. Si tin sangura rond di cas, check esakinan y tiranan afo. Haci e barinan aki limpi, banda paden. E webonan por keda pega na e parti paden. Pa limpia tur e barinan cu tin rond di cas.
Tin casonan di hendenan ta bay dokter y ta sospecha cu ta dengue of chikinguya. Aworaki a habri aña cu control grandi ariba negoshinan di tire, unda cu GKMB a haya hopi problema, hopi criadero. Nan a manda un warning pa e personanan aki, pa nan control e tirenan aki, deshaci di nan mas pronto posibel ya cu e ta crea problemanan grandi den barionan.
Aña 2018 a habri cu controlnan rutinario, na Playa, Noord, y Savaneta. Esaki mester wordo haci pa tin un cifra pa wak con e situacion ta na Aruba. Apart di esey, GKMB ta atende cu yamadanan cu ta drenta di hendenan cu ta sinti molester nan cas, nan ta bay check e situacion. Si mester ta fumiga e cas. Apart di esey tambe, claramente, tur biaha nan ta reageer ariba casonan sospechoso, dus casonan cu nan ta haya internamente for di DVG.
GKMB ta haya casonan sporadico, pero e menasa di dengue y chikinguya t’ey presente.
Door di cu tin hopi criadero, pro tin e peliger di un outbreak. Sr. Cheung ta pidi pa comunidad tambe yuda e team di GKMB, ya cu nan no por ta ariba full Aruba, den un siman y tampoco un luna. E ta un problema hopi grandi, cu mester di ayudo di comunidad. Spuitmento ta ultimo recurso cu si tin outbreak cu por domina of purba domina e outbreak, pa e stop di sigui cana. E trabao mas grandi cu tin cu wordo haci, ta door di e comunidad mes.
GKMB su regla, conhuntamente cu DVG (Hygienische Dienst), City Inspector y Polis, ta comunica e problemanan aki na e otro departamento y asina ta purba soluciona esakinan mas pronto posibel. Tin hopi hotspot, y esakinan ta conoci na GKMB. Pero esakinan no tin criadero di Aedis Aegypti, cu ta transmiti e virus di dengue. Pero si nan tin un lista di negoshi y casnan, cu tambe ta un problema door cu nan tin criadero constantemente ariba nan tereno. Esaki ta un di e stapnan cu GKMB kier haci e aña aki of esun binidero, pa por tackle e casonan aki cu mas man duro, segun Sr. Luis Cheung, director interino di GKMB.