Awo cu nos a conoce un awasero pisa, ta un bon momento pa nos cuminsa controla rond di cas, pa asina preveni criaderonan di sangura, segun Clayton Croes di GKMB a splica.
E ta agrega cu manera ta conoci, manera tur fin di aña ora cu awa cuminsa cay cu e indexnan, esta e cifranan cu GKMB ta sigui, segun voorschriften di WHO y PAHO, esaki ta core laat tambe cu e casonan confirma di dengue, chikungunya y zika tambe ta subi. Di e mesun manera aki por bisa cu mescos cu tur aña e peliger tambe pa nos por wordo infecta cu e malesa di e tres virusnan menciona ta aumenta y sigur cu e cantidad di yobida cu ta cay sigur lo bay tin un efecto riba esaki, aunke cu tur e programanan preventivo y accionnan preventivo cu a wordo haci, semper e cooperacion di pueblo ta esencial y den esey atrobe e yamada na pueblo pa sigui controla rond di cas. Ora cu tuma nota cu berdad ta haci controlnan rond di cas y no ta mira mehoracion den e problematica pa sangura, contact GKMB. nan tin inspectornan cu ta haci tipo di trabaonan aki pa hopi tempo y cu e cantidad di hendenan cu tin por adresa tur e yamadanan cu bin eynan.
E accion di swipe cu tabata tin comienso di aña por a mira su efecto, pa loke ta e casonan confirma di e virusnan durante di e aña a wordo basta bon controla te ainda. Sigur awor despues di yobida accionnan grandi manera un swipe actie sigur lo por duna efecto, pero te ainda tin cu corda cu e cooperacion di pueblo ta keda esencial y cu un plan strategico ta prepara pa un temporada manera esaki, cu tin hopi yobida cu e plan ta poni riba mesa. Awor ta cuestion di ehecuta y si wak cua di berdad ta bay pasa cu e casonan confirma pa loke ta dengue, chikungunya y zika pa e simannan cu ta bay bin. Tin hopi sangura caba riba nos isla. Awor cu tin yobida ta premira cu e cifranan ta bay subi y ta bay tin mas sangura, pero ta bon pa corda cu e casonan confirma a keda abao, aunke no tabata tin hopi yobida. Esakinan a tarda pa subi y ta spera cu e accionnan cu a wordo haci den pasado y loke ta bay wordo haci ainda, den fin di aña y na comienso di aña cu esakinan lo sigui tuma efecto pa reduci e posibilidadnan cu ta haya outbreaknan grandi riba nos isla, pero kedando di conta riba e cooperacion di pueblo.