E mensahe principal di Gele Koorts en Muskiet Bestrijding (GKMB) despues di e awasero duro cu a crea criaderonan rond Aruba, ta cu por spera mas presencia y molester di sangura y ta esencial pa cada ciudadano haci su maximo esfuerso pa preveni brote di Dengue, Chikungunya y Zika.
E vectornan (sanguranan cu ta carga y transmiti e virus) pa e tres virusnan aki, esta Aedes Aegypti y Aedes Albopictus ta presente na Aruba. Tur dos ta sangura preto cu patanan cu strepi blanco. E sangura cu tin mas presencia ta e Aedes Aegypti.
Clayton Croes di GKMB a splica cu e awasero tin como consecuencia cu mester modifica e caracter di tareanan di GKMB y e trahadonan di GKMB lo no ta concentrando riba e trabao di control di cas pa cas, pero lo enfoca riba control preventivo di instancianan cu ta sirbi clientenan cu ta cay den e gruponan vulnerabel y area y casnan di risico halto.
Den e segmento di instancianan cu clientenan vulnerabel ta inclui casnan di hende grandi y scolnan. Negoshinan manera tireshop, areanan manera dumpnan ilegal y santananan ta cay den e grupo di areanan di risico halto. Algun di e luganan aki ta conoci pa a causa problema den pasado. Ademas di e gruponan aki tin 53 cas reparti rond di Aruba cu ta haya atencion extra como cu a haya criadero y tabatin retonan na e casnan aki varios biaha.
GKMB ta alerta comunidad pa e hecho cu por spera di mira larva pa diahuebs caba den awa. E proceso di bay di webo pa larva pa sangura adulto ta bay hopi lihe den e clima di Aruba y ta pidi atencion pa elimina criaderonan potencial mas pronto posibel. E cantidad di criadero ta bay subi, Clayton Croes a laga sa, e indexnan cu GKMB ta monitor henter aña lo conoce un aumento y esaki ta aumenta tambe e posibilidad pa transmision di Dengue, Zika y Chikungunya.
E ta agrega cu e trabaonan preventivo, incluyendo e accion di swipe mas tempran den aña, a duna resultado y por nota esaki bek den e cifranan hopi abao di cantidad di casonan confirma di Dengue, Zika y Chikungunya. Sigur ora compara cu e region e cifranan di Aruba ta hopi abao.
GKMB ta bon prepara, Clayton Croes a comenta, tin tur material pa trabao necesario; esaki ta inclui materialnan di proteccion pa e empleadonan mes, como tambe larvicide, adulticide, powersprayers y mashinnan di spuit nobo cu ya a wordo pidi y ta na caminda.
Ademas di e accionnan di control, GKMB semper ta sigui cu su tarea di educa y duna conseho, e trahadonan di GKMB ta prepara, specialisa y tin hopi experiencia, sinembargo, Croes a subraya, e cooperacion di pueblo ta keda esencial.
Un factor cu ta hunga un rol grandi den e parti di control y eliminacion di criadero y criaderonan potencial y pakico GKMB ta sigui pidi e cooperacion semper di comunidad ta cu e cantidad di cas a bira mas grandi na Aruba, pero e cantidad di trahado na GKMB no a subi.
Aruba su VAT (vector action team) a reuni y a determina con nan ta bay desplega e trabaonan di prevencion, y nan ta riba caya caba como cu por spera e larvanan caba prome cu fin di siman y nan kier pone enfasis riba e ciclo di bida (e bio-ecologia) di e sangura cu ta move mas lihe.
Controla rond di cas, basha tur awa afo, of muha mata cu e awa para, no laga awa para mas cu algun dia, sigur no pa un siman y yuda preveni pa malesanan plama. Un gran parti di prevencion y cuido ta den nos mesun man.